ORANJESTAD (AAN): E aña aki riba 27 di April, YMCA Aruba a celebra su di 66 aña di existencia.
Y relaciona cu esaki, nan a bin cu un campaña pa recorda e celebracion grandi aki. E ta algo cu nan ta sostene cu directiva mes cu kier haci algo pa asina nan haya . Directiva a hinca e campaña den otro, y e ta yama ‘Share Your Y”.
Aki ta pidi comunidad pa comparti nan storia, y recuerdo, y tur cos bunita cu nan ta recorda di YMCA, sea como mucha, como adulto, of cu nan a traha na YMCA.
Segun Mariana Kelly kende ta Secretaria General (Directora) di YMCA, e campaña aki ta uno djis pa mustra tur hende kico YMCA ta haci.
E campaña lo ta uno pa recauda fondo tambe pa YMCA, pasobra nan ta un organizacion cu ta traha sin fin di lucro, cu ta opera danki na donacion. Nan tin un Traimerdia cu yama Y’s Care cu ta activo pa 35 aña caba. Aki nan ta atende mucha di 4 te cu 17 aña, unda nan ta haya almuerzo y tambe chens di haci huiswerk, y actividad cu lidernan.
Tambe tin un grupo di 10 pa 12 teenager cu tur Diabierna ta traha pasaboca pa henter e Centro, y ta haciendo esaki hopi fenomenal mes. Siman pasa mes nan a traha Chicken Quesadillas.
E retonan mas grandi pa YMCA Aruba ta e aspecto financiero. Tambe nan kier bin cu diferente proyecto, pero pa tur esaki mester di subsidio.
Kelly a bisa cu por ehemplo, nan Traimerdia tin un partnership cu YMCA LACA, cu ta un YMCA di Latino America y Caribe, y via di nan ta haya un subsidio anual pa asina por ehecuta diferente proyecto den e Traimerdia.
E aña aki mes tabatin proyecto di Fotografia tanto na YMCA San Nicolas como YMCA Dakota. Aworaki na YMCA San Nicolas tin un ‘Science Class’ ta ser duna, y na YMCA Dakota tambe tin di cushinamento, y lo bay tin un ‘Coding Class’ hunto cu e compania renombra Gamma Solutions cu ta bay yuda hobennan di 8 pa 11 aña. Tur esaki ta posibilidad cu nan por ofrece hobennan di Traimerdia, danki na e partnership cu YMCA LACA.
