IDEA a organisa dos webinar interesante

ORANJESTAD (AAN) – Departamento di Asuntonan Economico, Comercio y Industria (DEACI) mediante su unit di Iniciativa pa Desaroyo di Empresa Arubano (IDEA) a organisa dos webinar den luna di april conhuntamente cu Fantastic Garden Aruba y ActionCOACH.

            Dia 21 april, IDEA a organisa un webinar pa tur esnan cu ta desea un oportunidad den haci negoshi den e ramo di Flor, den forma di areglo pa regalo of den forma di bouquet. E webinar aki a wordo presenta door di sra. Marylaine Croes, Store Manager di Fantastic Garden Aruba.

            Sra. Croes tin un estudio di Bachelor’s Degree den Plant Science. Sra. Croes a splica den un manera hopi creativo e diferente tipo di flornan cu por planta na Aruba.

            Dia 30 april ultimo, IDEA conhuntamente cu ActionCOACH Aruba, a organisa e segundo webinar di Women Entrepreneurship cu un grupo femenino a organisa.

            E prome webinar a tuma lugar den luna di maart, como cu esaki tabata e luna cu a celebra e Dia Internacional di Hende Muher. E segundo webinar aki a hiba e titulo di “From Entrepreneur to Entrepreneurship”.

            Den e presentacion aki, sr. Dave Martinus, Certified Business Coach, a elabora primeramente riba e ‘Big Five’ caracteristicanan di un personalidad, tambe e caracteristicanan di un personalidad empresarial y e conocimiento empresarial, caracteristicanan personal pa ta un empresario unico, e proceso empresarial, e diferencia den e definicion di empresarial y di ta un empresario y kico ta e caracteristicanan di un empresario.

            Den siguiente lunanan, IDEA lo sigui organisa un serie di webinar pa Women Entrepreneurship (WE). Ambos webinar aki a tuma luga via e plataforma digital di Google Meet y ZOOM y a haya un participacion di en total 21 persona.

            IDEA ta sumamente contento cu e contenido di e webinarnan y tambe di e bon comentarionan ricibi di su participantenan na final di ambos webinar y via email. Ambos webinar tabata sigur hopi creativo y informativo y cu preguntanan di parti di e participantenan y un tremendo presentacion di parti di sra. Marylaine Croes y sr. Dave Martinus.