A celebra di dies aniversario di existencia:
ORANJESTAD (AAN) – IDEA (Iniciativa pa Desaroyo di Empresa) a celebra, recientemente, su di diez aniversario di existencia. Pa e ocasion aki, den presencia di e personal y partnernan, Minister di Economia, Comunicacion y Desaroyo Sostenible, mr. Geoffrey Wever a hiba palabra.
E mandatario a cuminza na bisa cu como Minister di Asuntonan Economico, el a desea pa conmemora esaki y celebra en grandi e logro aki desde 2012.
E dignatario a expresa cu desde cu IDEA a wordo estableci na 2012, e Instituto a cuminza yuda y duna guia extenso, na hopi comerciante, tanto esun cu a habri un negoshi chikito nobo, of esnan existente.
“Awe nos ta recorda y celebra e inicio di un structura di business support services na Aruba, y a inspira diferente organizacion pa despues nan brinda e mesun tipo di servicio, tur esaki na bienestar di nos comerciantenan chikito y grandi”, Minister di Economia a expresa.
E dignatario a splica cu IDEA ta un unidad di Departamento di Asuntonan Economico cu a nace di e necesidad pa duna informacion, guia y conocemento na Aruba su companianan mediano y chikito y a wordo crea a base di structura di “Americas small business development center”, un instancia cu a duna su aporte grandi na miembronan di IDEA, cu a bay pa haya training y conocemento riba tereno di asistencia na companianan chikito y mediano.
“Cu introduccion di IDEA, diez aña pasa, e Departamento di Asuntonan Economico a cuminza transforma den un departamento mas accesible pa sector priva, y asina adapta na e dinamismo empresarial cu a transforma tambe otro partinan di e departamento di Asuntonan Economico agilizando proyectonan pa permiso di negoshi, promocion di exportacion, y asina hopi mas” e mandatario a señala.
Guia y apoyo na companianan mediano y chikito no ta algo cu por sosode riba su mes. Segun minister Wever, asina den e transcurso di añanan, IDEA tambe a sa di amplia su partnernan strategico, trahando hunto cu otro organizacionnan cu ta comparti e meta di capacita y capacita, e empresario, yudando cu idea y su servicionan gratuitamente, IDEA a busca cada dia e balansa entre ofrece servicionan basico gratuito, di cooperacion cu sector priva cu ta continua cu servicionan mas dirigi na clientenan individual.
“Asina a logra forma alianzanan duradero strategico di cual hendenan ta beneficia, y asina mi kier yama bon bini na bosonan, partnernan strategico di IDEA. Na comienzo di IDEA esaki a lanta y opera, solamente cu fondonan di gobierno. Sinembargo di 2016 te 2018, a logra haya apoyo di fondonan europeo di nomber COSMO, dirigi na fortalece e companianan mediano y chikito den paisnan den Caribe. “E fondonan aki a brinda IDEA e oportunidad pa sigui desaroya su mes ainda, y hasta a bira un ‘best practice’ den region di Caribe, riba temanan manera Maneho Empresarial, Entrepreneurs, y tene eventonan den cual a introduci experticia den temanan internacional”, e dignatario a señala.
{gallery}IDEA a lanta cu e meta di duna ayudo, guia, apoyo y fortalece empresanan mediano y chikito{/gallery}
