ORANJESTAD (AAN): Dialuna mainta na momento di Blackout, a drenta varios yamada di ciudadanonan di
Monserat, Boegoeroei, Turibana cu a bisa cu ademas cu nan a keda sin coriente, awor no tin awa ta sali di cranchi tampoco.
Tur esaki a wordo confirma pa Director di WEB Aruba NV, esta Alfredo Koolman. El a pinpoint esaki riba e proyecto di e compania pa bay basha abao y construi un tanki nobo di awa na Alto Vista.
E trabao di elimina esun eyriba, ta riba plan pa varios aña caba pa e compania. E edad di e tanki ta riba 40 aña caba, y el a yega e periodo pa e wordo reemplaza. WEB Aruba NV tin e trabao aki poni den un proyecto pa bin cu un tanki nobo.
Pa casualidad, como 2 siman pasa e tanki na Alto Vista a cuminza confronta problema! Ey bo ta mira cu berdad su periodo di reemplazo a yega. Esey a forza WEB Aruba NV pa laga tur awa sali di eyriba, y no a yen’e bek.
Tur tuberia cu ta cubri parti noordwest di Aruba, a wordo poni riba e pompnan potente cu tin poni e.o. esun banda di highway di Paradera, pa asina pueblo di distrito di Noord por sigui haya awa ora di habri cranchi.
Pa awor e proceso di haya permiso pa basha e tanki abao, y permiso pa construi uno nobo ta pendiente pa ser obteni. Pero ya caba e tanki ta full bashi y ningun hende ta hayando awa di eyden mas.
Pesey mes, ora cu coriente a bay Dialuna marduga, e pompnan grandi banda di caminda di Paradera y otronan a stop di funciona. Consecuentemente no tabatin presion di awa cu ta wordo manda mas pa e tubonan cu ta yega te na costa mas noordwest di Aruba.
Te ora cu e tanki nobo wordo construi, desinfecta, inspecciona, y yena bek na Alto Vista e ora numa distrito di Noord por tin presion bek di awa sea cu of sin coriente. Pa awor tur cos ta depende si e pompnan auxiliar di WEB Aruba NV tin coriente of no pa yuda hende haya awa.
