Edwin Jacobs, director AZV:
ORANJESTAD (AAN) – Den conferencia di prensa convoca pa director di AZV, unda el a referi na diferente aspecto di cuido medico pa e aseguradonan local den exterior, Jacobs a enfatiza cu despues di 20 aña di existencia di AZV, nan tin basta bon control riba e procesonan na Colombia. “Nos a siña hopi den e 20 añanan aki, cu nos ta manda pashentnan afo, y den nos comunicacion cu otro islanan di Antiyas of ex-Antiyas, tur ta ‘look up’ cu nos a logra den 20 aña, pasa den diferente proceso.
Ainda, otro aseguradonan den Antiyas ta luchando con pa controla e gastonan, y nos a yega asina leu cu nos ta controla esakinan y bin cu un licitacion nobo, y nos ta bay keda mas skerpi den specializacionnan. Pa Bogota pa keda pa casonan grandi y sumamente complica, y uza e otro hospitalnan manera Bucaramanga y Cali, y si nos contrata otronan, pa casonan cu no mester di mucho specializacion”, Ir. Edwin Jacobs a subraya, indicando cu hunto cu e sector medico lo traha riba esaki.
Jacobs a remarca cu AZV a constata cu un area cu mester sigui traha riba dje, ta e comunicacion, entre e specialistanan na Aruba cu specialistanan cu ta wordo contrata. Nan mester conoce otro, conoce e procedure di otro, comunica cu otro, y den e comunicacion cu otro telemedicina ta bay bira esencial den e parti aki.
“Miho comunicacion adelanta tin entre e specialistanan, miho tratamento y miho experiencia e asegurado ta bay haya y esey nos lo ta reglando cu e licitacion nobo aki”, Edwin Jacobs, director di AZV, a conclui.
