IBiSA trahando duro cu programanan pa tene adulto mayor y henter comunidad activo

Rodymar Geerman, di IBiSA:

ORANJESTAD (AAN) – Rodymar Geerman, di Instituto Biba Saludable y Activo (IBiSA), a relata den entrevista cu DIARIO cu IBiSA ta hopi activo na henter Aruba, y den su departamento ta mas obvio cu den e parti di adultonan mayor nan ta trahando hopi duro riba dje.

            El a remarca cu IBiSA tin diferente actividad pa nos grandinan, por ehemplo e programa “Nos Grandinan Activo” y na Sport Center San Nicolas tin esun di mas grandi cu nan tin, cu ta cuminza for di 7 or di mainta. “Aki nos tin tres grupo a haya e oportunidad di haya les, y tambe riba Diamars y Diahuebs, nan ta bayendo full na San Nicolas. Eynan por wak cu no ta solamente e movecion fisico, pero pafo den un pool tambe, pasobra na Aruba nos ta rondona di awa y pa nos tambe esey ta parti importante”, Rodymar Geerman a comenta.

            Geerman ta haya jammer cu no den tur Aruba tin pool cu por ofrece e parti aki na otro barionan, pero si ta bon pa bisa cu San Nicolas tin e agrado di por cumpli cu esey. Esaki ta di Dialuna pa Diabierna tambe completamente yen. Tambe tin na Simeon Antonio, lesnan cu ta wordo duna di Dialuna te cu Diaranzon, y tambe eynan ta cuminza 8’or di mainta.

            “Nos ta yudando tambe e grupo grandi di Flor di Aloe, di Bario Dakota; aki tambe nos tin instructornan cu ta yudando nos grandinan. Nos ta sigui na Bario Noord, cu tambe nos tin programanan pa adulto mayor. Aworaki, nos ta sinta aki na Kibrahacha, y sigur nos ta contento di por duna un man na nos Club di Kibrahacha 60 plus, p’asina tambe nos grandinan por haya movecion. Akinan ta haya movecion dos biaha mas, si nos bay Diamars cu Diahuebs di 9 pa 10, ora cu nan ta mas movible, yuda nan den e parti cognitive tambe, cu weganan, recreacion, unda nan ta uza mente pa nan por keda bij, y asina e ora ey, nos ta contribui na nan salud”, Geerman a agrega.

            El a menciona cu esaki ta parti di e programa di parti di IBiSA cu nan tin pa nos adultonan mayor. “Pero mi ta kere nos tin e comunidad activo, nos ta bay y cu bario activo dentro di poco. Dus, IBiSA ta trahando riba mas proyecto p’asina comunidad henter por ta den movecion”, Rodymar Geerman a conclui.