Directie Natuur en Milieu:
ORANJESTAD (AAN): Directie Natuur en Mileu ta duna di conoce cu e sorto di Calco aki tin e nomber cientifico Strombus costatus of tambe Macrostrombus costatus. Na Ingles e yama Milk conch. E ta un di e 7 especienan di e famia Strombidae, cu ta molusconan gasteropodo marino.
E calconan aki ta di tamaño mediano te grandi y ta midi mas o menos 15 cm largo. E diferencia mas notabel den e ‘genus’ aki ta na e parti abou di e bestia, na e apertura of na e lipnan di e calco, e asina yama ‘stomboid notch’.
E casca di e calco adulto aki ta color blanco paden y p’esey e ta haya e nomber asocia cu lechi y e parti pafo ta color crème y ta sinti grof. E puntanan riba su casca ta grandi y poco rondo. E wowonan di e calco ta varia den colornan cora, oraño y preto cu ta pega na su tenglanan.
E bestia aki tin musculo fuerte cu e ta uza como pia, esaki ta yud’e lastra of move. E calco M. costatus ta prefera habitat di yerba di lama y santo cu ta lodo y awa menos hundo cu profundidad di entre 2 pa 20 meter. Den area di rifnan ta pa asina nan por sconde, come alganan y yerbanan di lama.
E calconan di famia Strombidae tur ta bestia hebrivoro. E calco aki tin organo sexual exterior cu ta visibel asina ta diferencia entre macho y embra.
E ciclo di bida di calco ta cuminsa desaroya den forma di larva plankton. Despues, ta pasa den proceso di metamorfosis y ta haya forma spiral, esaki ta tarda 26 pa 30 dia. E sorto aki por biba te casi 25 aña.
E especie tin importancia halto den comercio y esaki ta pone cu e tin un disminucion den su poblacion.
