Iberostar Grand Aruba ta bay bira un hotel elegante y luhoso na Eagle Beach

E lo tin 240 camber pa adulto

ORANJESTAD (AAN): E construccion ta como 35% cla caba.  Aruba ta bay haya otro aña un di e top Hotelnan cu tin rond mundo dedica na servicio total, di luho, pa relaha, y disfruta di e cumindanan cu nan a bira famoso pe rond mundo.

   Ta trata aki di un Hotel di e compania Iberostar, cu lo carga e nomber “Iberostar Grand Aruba”.  E ta na Eagle Beach, unda antes tabata POVA-Club, y lo wordo diseña cu adultonan den mente.

   E hotel aki di categoria-superior, elegante, y luhoso lo bay tin facetanan arkitectonico extraordinario, cu suites espacioso cu amenidadnan di calidad halto.

   E diseñador, esta arkitecto Jose Maria Lopez a pasa basta tempo na Aruba pa conoce e area, pa admira tur loke Aruba ta dispone di dje, y a keda encanta cu e piscanan yama ‘Parrot Fish’, principalmente e colornan.

   Esey ta loke Lopez a inclui tambe den e diseño, y e colornan di e Parrot Fish lo bay ta visible tur caminda den e edificio aki.

   Iberostar ta usa diferente tipo di nivel pa categoriza e Hotelnan.  Esnan mas ‘premium’ ta haya e nomber di ‘Coral level’.  Y e Iberostar Grand Aruba lo bay ta uno di Coral level’, pues cu luho den tur skina, y solamente pa adulto.

   E Hotel na Aruba lo bay tin 240 camber/suites, cu diferente piscina.  E lo bay tin un Convention Center, Casino, un monton di Restaurant.

   Recientemente DIARIO hunto cu demas prensa di Aruba a wordo invita pa conoce e concepto di Iberostar, y a haci esaki na Riviera Maya, na Cancun (Mexico).  Aki a bin mira con e Hotel di nivel Coral, ta dispone di e.o. mayordomo pa cada camber, un cantidad di concierge pa yuda planea bo dia como debe ser, y opcion na monton pa come almuerzo of cena eynan.

   E asina yama Iberostar Group ta un compania multinacional di Spaña cu ta pertenece 100% na un famia, dedica na mas di 65 aña na viahe y hospitalidad, como tambe raiznan empresarial cu ta data di aña 1877.  Iberostar Hotels & Resorts ta consisti di un portfolio di mas di cien Hotel di sea 4-strea of 5-strea den 16 pais.

   Algo cu DIARIO por a nota den e bishita na Cancun, ta cu e compania aki ta un pionero den e modelo di turismo responsable cu ta enfoca riba hende y oceanonan.  Nan dedicacion full riba medio ambiente, y bienestar di lama, a haya aun mas forza ora cu nan a introduci e programa ‘Wave of Change’, cu nan ta yama WOC.  Esaki a wordo lanza na 2017 y ta consisti di tres linea di accion:  Move pa un economia circular, promove consumo responsable di pisca, y mehora salud di costanan.  Y esaki por a nota con na Cancun, e hotel tin su propio Biologo Marino den servicio, y tambe un experto pa proteccion di Mangrove.  Tur nan cuminda di lama cu ta wordo cumpra, ta bin di recursonan sigur.

   E Iberostar Grand Aruba cu nan ta bao construccion, lo keda cla pa zomer 2023.  Keda pendiente, e siman aki DIARIO lo bin cu mas detaye encuanto e diseño di e Hotel aki.