Iberostar a lanza nan klaslokaal unda por duna les riba sostenibilidad y ecosistemanan marino

A ser construi den e hotel mes

ORANJESTAD (AAN): E siman aki, Iberostar a inaugura oficialmente un lokaal di les cu nan a construi den nan resort nobo di JOIA Aruba by Iberostar na Eagle Beach.  E espacio aki ta bira conoci como ‘Aula di Lama’, y ta un leslokaal educacional cumpliendo cu Iberostar Wave of Change (IWoC).

   Aula di Lama ta un espacio multifuncional y participativo crea pa comunidad local, incluyendo scolnan y gruponan NGOs, pa studia y explora e topiconan relaciona cu sostenibilidad cu enfoke particular riba e ecosistema marino y di costa na Aruba.

   Den su prome lunanan, Aula di Lama lo enfoca riba ofrece e espacio aki na diferente organizacion cu ta dedica nan mes pa proteha naturaleza na Aruba, y reforzando e conexion di comunidad pa cu medio ambiente.  El a wordo desaroya door di Iberostar Foundation, y e meta cu e lokaal di les aki ta pa crea un espacio participativo y di colaboracion cu e vision pa educa hende riba e aspectonan relaciona cu naturaleza na Aruba.

   El a wordo introduci oficialmente na publico di Aruba riba Dia Mundial di Oceano.  E portanan di Aula di Lama ta habri pa organizacionnan NGOs local, docentenan, studiantenan, y miembronan di comunidad via di un evento dedica.  Como parti di e lanzamento aki, acuerdonan di colaboracion a wordo firma cu siete organizacion di mas importante: Aruba Birdlife Conservation (ABC), Zero Waste Aruba, Metabolic Foundation, Red Cactus Foundation, Wit Gele Kruis, Aruba Coral, y IOC Unesco.  E partnershipnan aki ta marca un paso importante pa fomenta un enfoke uni pa sostenibilidad y educacion na Aruba.

   E evento a purba inclui participantenan y mustra nan con nan por usa e lokaal aki pa haci investigacion, siña, y colaboracion.  Esnan cu tabata presente, a ser duna e chens di explora e lokaal aki, descubri su recursonan, y participa den un sesion encuanto e importancia critico di educacion di ecosistema.

   “Aula di Lama ta representa nos dedicacion na sostenibilidad, e compromiso cu comunidad, y educacion ambiental,” ta loke Jareth Vermeulen a indica, kende ta Sustainability Alliances Manager na Iberostar.  “Nos ta encanta di ofrece e lokaal aki na docentenan di Aruba, y na personanan cu por trece cambio, como un centro di educacion y accion”.

   E lokaal aki ta strategicamente situa banda den edificio cu entrada banda panort di Hotel, net na Shoco Boulevard, y asina Aula di Lama lo sirbi como un base pa programanan educativo, workshop, y investigacion riba veld.  E lokaal ta cumpli cu e mision di e fundacion pa contribui na e transformacion di destinonan mas resiliente dilanti e cambio climatico, conectando futuro generacionnan cu espacionan natural cu tin rond di nan.

   E iniciativa ta conta cu apoyo completo di movimento Iberostar Wave of Change, reforzando e compromiso comparti cu e maneho ambiental, y resiliencia di comunidad.

   Organiacion- y scolnan cu ta interesa di usa Aula di Lama, por contact This email address is being protected from spambots. You need JavaScript enabled to view it. pa haya sa mas con pa reserva e lokaal y participa den actividadnan na caminda.  Tur esaki pa bin cu un cambio positivo via di turismo positivo.