Director Roland Croes
ORANJESTAD (AAN): Ora algo ta cambia, tin biaha ta duro pa comunidad acepta cu un sistema nobo ta wordo introduci.
Sinembargo tin otronan cu semper ta haya cu ta bon pa den e mundo aki, sigui trece cambio! Y e compania Setar NV tambe semper ta gusta ora algo nobo ta wordo introduci.
Durante conferencia di prensa unda Stichting Musica a divulga cu Aruba Caiso Monarch lo bay ta riba Diasabra 9 di Augustus venidero, y cu e titulo di ‘Calypso Showdown’, ademas di Edwina Werleman a nota cu Roland Croes, director di Setar NV tambe a hiba palabra.
Croes na su turno a indica cu nan ta contento cu pa 2025 ta rebibando cu e Festivalnan pa Soca Monarch, y awor ta pensa cu pa Caiso ta bin cu otro tipo di actividad. Asina ta bay bek un tiki den tempo, y trece e cantamento dirigi palabra pa otro, cantamento pa pueblo, y di e forma ey Calypso ta e raiz di musica.
“Nos kier crea e anochi aki un ambiente unda pueblo ta sinta y scucha y goza e musica den tur su gloria,” Croes a indica.
E kier pa e Calypso Showdown aki lo por sigui crece y bira parti di un cultura di e musica cu ta bin di San Nicolas. Un cambio cu por mira con ta crece e actividad y lage keda resona henter aña. E idea di “test e concepto aki”, ta algo cu semper ta atrae Setar NV pa inverti den dje.
Calypso Showdown lo tuma lugar e anochi di 9 di Augustus dilanti Kulture Cafe na San Nicolas, den aire liber. Lo cobra 35 Florin pa entrada, y di antemano gruponan por busca mesa tambe. Luz y sonido lo ta den man di Elite Productions. Entrada ya caba ta obtenibel via e plataforma Pay.aw pa asina por sigura bo entrada.
