"Hunto nos a logra cu Eagle Beach ta e playa number 1 den Caribe y hunto nos tin cu cuid’e'

Premier Evelyn Wever - Croes:

ORANJESTAD (AAN)- Recientemente a ricibi e grato noticia cu e bunita playa di Eagle Beach a wordo nombra como e playa number un den Caribe y pa loke ta henter mundo, Eagle Beach ta na di dos luga.

            Prome Minister Evelyn Wever - Croes a expresa cu e ta hopi orguyoso y contento cu e logro aki.  E nominacion aki a bin di e plataforma Tripadvisor a base di tur e turistanan cu a bishita Eagle Beach y cu a haci e recomendacion aki, y asina Aruba a gana number un.

            E nominacion aki no ta algo cu a bin di su mes, e ta resultado di un vision di gobierno pa percura cu tur nos patrimonionan historico y nacional keda wordo manteni.

            Prome Minister a splica cu dos aña pasa a haci un inversion hopi grandi y a dicidi cu ta bay haci un limpiesa total riba e playanan na Eagle Beach y na otro playanan rond Aruba.

            E inversion a encera cu a pone santo nobo y a prepara e playa  di tal forma cu tur hende por gosa di dje. “Nos a gana e premio aki hunto, aworaki ta hunto nos mester sigui traha pa mantene,” Prome Minister a enfatisa. 

TEMPORADA DI CAMPAMENTO

            Aworaki nos ta drentando temporada di campamento, un temporada cu henter comunidad ta gusta gosa di e playanan. Pesey Prome Minister ta haci un apelacion na comunidad pa gosa di nos playanan pero cuide tambe y tene cuenta cu kico bo por haci y kico bo no por haci. 

            “No laga nos playanan sushi y no destrui nos playanan. Si tene cuenta cu esaki, nos tur por tin bunita playanan pa disfruta di dje pa hopi tempo mas, Prome Minister a finalisa bisando.