Prome morto di trafico pa 2022
ORANJESTAD (AAN): Tur cos ta mustra cu un Toyota Vitz color shinishi tabata moviendo Diaranson marduga cu velocidad masha halto mes riba Watty Vos Boulevard, for di Cumana direccion pa Sero Patrishi.
Pa un of otro motibo, y cu ainda ta bao investigacion, e chauffeur di e Toyota Vitz aki no a ripara cu tin un Toyota Hilux Pickup Single-Cab color cora su dilanti tambe coriendo bayendo rumbo Sero Patrishi. E chauffeur di e Vitz no a regla velocidad na tempo, y ora cu el a mira cu e ta bay dal den e Pickup, el a primi brake.
El a lastra un brake masha largo mes, pero asina mes cu e momentum di su velocidad, el a bay dal fuertemente tras di e Pickup.
Den pueblo tin e costumber di bisa: “E auto a bay bisti tras di e pickup”. E Toyota Vitz a literalmente pusha y drenta bao di e pickup, y esta cu por poco e baki di e Pickup a drenta den cabina di e Vitz.
E impacto aki a pone cu un spare-tire di e Pickup a bula sali di e vehiculo y cay cerca di e separador di e Boulevard.
Golpinan hopi fuerte: Testigonan a bisa cu e Pickup e ora a keda bons algun biaha (y hasta a rasca/coba varios parti di e asfalt) y bay cay banda pariba di caminda, net unda cu e contratista a traha un Duiker di concrete pa pasa bao di Boulevard.
Tanto e impacto causa pa e auto cu a dal nan tras, y despues e impacto di cay for di e Boulevard den e rooi eybao net dilanti e Duiker, a pone cu tur dos persona den e Pickup resulta gravemente herida.
Testigonan cu a yega cerca, mesora a stop nan auto pa asina bay check e chauffeur di e Vitz, y tambe pa bay mira esnan den e Pickup cu a cay 6 meter pariba di caminda.
Vocero di Polis a confirma, cu pa 1:23 am e prome yamada a drenta na Central di Polis, cu a raporta e accident serio aki riba Watty Vos Boulevard. E ta net 260 meter pazuid di e Paperclip Rotonde na Sero Patrishi. E accident aki a socede como 45 meter zuidoost di e cas Sero Patrishi #20.
Mesora e unidad di Polis di Playa a ser manda maximo urgencia pa e lugar di accident. Ora cu nan a yega, nan a mira e situacion y mesora a rekeri tambe presencia di Ambulans, y tambe a pidi pa Vehiculo di Rescate di Cuerpo di Bombero acudi na e lugar.
Chauffeur a huy na pia mes: For di e Post di Ambulans na Wayaca, dos unidad di Paramedico a yega den 6 minuut di tempo na e lugar.
Polis mientras tanto a nota cu e dos hendenan den e Toyota Hilux Pickup color cora cu number A-2462 ta basta herida. Ora cu nan a bay check pa e chauffeur di e Toyota Vitz cu a keda total loss kibra riba Boulevard, testigonan a informa Polis cu e homber diripiente a rek un careda na pia y a desaparece di eybao.
Aki Polis a tuma nota cu e chauffeur aki lo a dal su curpa malamente tambe, y a check su number di auto A-57912, y via e Computer di DIMP a bin haya sa riba nomber di ken e ta registra. A manda un unidad di Polis na e adres, pero no a haya e chauffeur masculino na e cas.
Mientras tanto, na e Toyota Pickup color cora, Paramediconan a mira cu e chauffeur masculino mes no tin señal vital mas. Su casa banda di dje tambe ta basta grave herida, y cu yudanza di Bomberonan, a logra stabiliza su situacion, y asina a sake di e Pickup, y cu rapidez a hibe pa Servicio di Emergencia na Hospital.
Constata morto den Ambulans: Nan a logra saca e chauffeur masculino tambe di e Pickup, y a pone riba brancard y hise den Ambulans. Pero como cu e no ta duna señal di bida, a solicita na Centro di Alarma 911 pa manda busca un Docter. Pa ley, un Ambulans no mag di transporta un persona cu a fayece.
Docter Texier a yega, y a drenta den e Ambulans cu a keda staciona eynan, y pa 2:20 am a constata morto di Robert Arturo Calmes, naci na Aruba dia 16 September 1964, pues tin 57 aña di edad.
Su casa, kende ta gravemente herida, ta un funcionario di Deurwaarder na Ministerio Publico.
Polis a notifica demas autoridad competente pa bin na e lugar, incluyendo Fiscal, Specialista di Trafico, y personal forensico di BFTO. Como cu famianan di e fayecido tambe a yega eybao, a busca asistencia tambe di Bureau Slachtofferhulp.
Analisando e Toyota Vitz, tabata falta djis algun centimeter mas pa e baki di Pickup a drenta full paden y kizas herida e chauffeur ey tambe gravemente.
Tristeza enorme: Na e lugar di accident, un tristeza enorme a reina cerca famianan cu a bin haya sa cu Robert Calmes a fayece. Es mas, Robert Calmes ta un comerciante basta conoci na Aruba pa e mundo di Food & Beverage, y a maneha e.o. El Porton II.
Chauffeur a entrega su mes: Riba Diaranson merdia, vocero policial Liliana Rasmijn a informa prensa, cu e chauffeur di e Toyota Vitz shinishi a bay entrega su mes na Polis.
El a splica cu e homber L.E.H.C. di 20 aña di edad, a acudi na Warda di Polis na Shaba, unda el a entrega su mes. El a wordo pasa pa Specialista di Polis di Trafico pa asina e wordo interoga.
Polis un biaha mas ta suplica cu ora bo dal auto, pa bo keda warda riba Polis of Roadservice. Pasobra pa ley di trafico, ta prohibi pa bo bay for di e lugar prome cu un di nan yega.
Robert Calmes a bira e prome morto di Trafico pa 2022. Tanto DIARIO como tambe Cuerpo Policial Aruba ta manda palabranan di profundo condolencia na famia di e fayecido.
