Hues cu preguntanan skerpi den caso di Mike de Meza contra Gobierno pa cu carta di Belasting

Pakico no kier duna carta di declaracion liber

ORANJESTAD (AAN): Diaranson merdia un multitud grandi di hende tabata presente riba e plenchi dilanti edificio di Corte, pa apoya nan politico Mike de Meza, kende a cuminsa un caso LAR contra Gobierno (Departamento di Impuesto). Hues a haci preguntanan skerpi tanto na e director di Departamento di Impuesto (DIMP), señora Gomez-Pieters como na hurista Duijneveld acompaña pa mr. D. Croes y de Meza mes.

   Carta di Belasting: Hues a puntra de Meza con e ta sinti, cu el a cuminsa e caso contra e carta di Belasting. De Meza a bisa Hues cu e ta tata di famia, 20 aña den politica, 2 biaha minister y awor den politica ta susha su bon nomber. De Meza a bisa Hues cu e ta lamenta esaki masha hopi. Hues a bisa de Meza cu ta lamentable cu mester bin Corte pa un caso.

   Hues a mustra cu tin carta di Inspector di Impuesto cu ta cuestiona cu e candidato pa Minister, de Meza, tin debe cu Belasting. E carta di Inspector di Impuesto a bay cerca Formador y tambe Minister Presidente a wordo informa. Esey a haci cu de Meza no por bira minister. Hues a bisa cu relaciona cu e caso, el a manda un lista largo di preguntanan na e abogadonan pa asina e haya claridad.

   Declara carta di belasting ‘no husto’: Abogado mr. Duijneveld a cuminsa bisa Hues cu e pregunta ta si Gobierno ta admisibel of no. El a bisa Hues cu e declaracion di DIMP ta importante den e caso aki. Duijneveld ta haya cu e comportacion di belasting no por tin efecto riba nombramento di de Meza como minister. El a mustra cu tin hurisprudencia riba esaki. El a bisa cu Formador di Gobierno a bisa cu e kier tin un declaracion liber di Belasting pa nombramento di de Meza como minister. Na opinion di Duijneveld, tin sentencia di Corte na Hulanda, cu e asunto di belasting no mester tin consecuencia pa nombramento di minister. Duijneveld ta haya cu nan demanda contra e declaracion di Belasting ta na su lugar.

1. D. Croes a bisa Hues cu de Meza tabata un exitoso comerciante y despues a drenta politica. Despues di eleccion, de Meza ta e candidato pa bira minister. Formador a pidi investigacion riba de Meza pa credibilidad. E carta di Departamento di Impuesto a pone cu a rechaza pa nombra de Meza. Na opinion di mr. Croes, tin atakenan di social media riba de Meza cu ta tacha su nomber.

   Den carta 14 April 2025 e director di Belasting ta informa cu for di investigacion na Maart 2025 no tin ningun debe di de Meza pa cu belasting. Tanto Formador, de Meza y abogado di de Meza, a haya informacion cu Belasting no tin ningun demanda di Belasting contra de Meza. A keda asombra cu Inspector di Impuesto a nenga di duna declaracion liber cu de Meza no debe Belasting.

1. Croes a bisa Hues cu de Meza, mescos cu hopi comerciante na Aruba, no a entrega nan papelnan di belasting na tempo. Door di esey bo ta haya boet. Pero despues por pidi un declaracion liber di Belasting. El a menciona cu tin caso di 2009 cu de Meza debe belasting. Segun ley, si e ta mas cu 10 aña, e no ta valido mas. E ta haya cu ta politiqueria ta wordo haci den e caso aki. A manda pidi Departamento di Belasting pa haya e carta liber di Belasting, pero Departamento di Belasting a mustra riba un caso di un politico na Curacao cu tabata sentencia pa caso di inmoralidad caminda no a wordo nombra. E abogado ta haya incorecto cu ta compara e politico di Curaçao cu de Meza.
2. Croes a cuestiona e forma con Departamento di Impuesto, DIMP, a atende cu e peticion pa declaracion di belasting.

   Mester rechaza demanda di De Meza: E director di Departamento di Impuesto, señora Gomez-Pieters a representa e Inspector di Belasting. El a desmenti tur loke de Meza ta trece padilanti. Señora Gomez-Pieters a bisa Hues cu mester rechaza e demanda di de Meza.

   Na opinion di señora Gomez-Pieters, no tin base pa Inspector di Impuesto duna declaracion liber di belasting na de Meza. El a splica cu na Maart 2025 a haya peticion di Formador pa haci investigacion di belasting riba de Meza. Señora Gomez-Pieters a remarca cu no ta asina cu a manda social media informacion tocante de Meza. E screening di de Meza ta encera diferente investigacion entre otro Belasting. A constata cu na 2020 y 2021, de Meza y su señora no a entrega papelnan di belasting y como tal no por duna declaracion liber di belasting.

   Na opinion di señora Gomez-Pieters, de Meza mester a pidi na Ontvanger un carta di declaracion liber y no Departamento di Impuesto. El a mustra cu 18 April 2025 e carta di declaracion di Inspector di Impuesto a bay Formador, caminda ta mustra cu de Meza tin debe di belasting y de Meza no ta di acuerdo cu e contenido di e carta. Señora Gomez-Pieters ta haya cu Formador a haya suficiente informacion pa cu e candidato pa minister. El a bisa cu ta Formador tin cu dicidi riba nombramento di de Meza y no Inspector di Impuesto.

   Señora Gomez-Pieters ta haya cu mester rechaza e demanda di de Meza pa reevalua e carta di belasting di Inspector di Impuesto. E ta haya e interes di de Meza riba su integridad, no tin nada di haci cu e evaluacion di Inspector di Impuesto.

   Hues cu preguntanan skerpi: Hues a mustra cu el a haya informacion cu de Meza kier pa reevalua e carta y drecha su integridad. Hues a mustra cu tabatin intercambio di cartanan y tin un parti di e debe di belasting paga. Ta asina cu Minister Presidente a bisa de Meza cu el a haya un carta cu no ta positivo riba asunto belasting y no por sigui e procedura pa de Meza bira minister. El a bisa de Meza busca un reevaluacion di Inspector di Impuesto pa asina por sigui cu e procedura.

   Exigencianan pisa pa bira Minister: Hues a puntra e director di Departamento di Impuesto, con mester mira si de Meza a paga un parti di e debe di belasting y no tin mester di paga mas, con lo para cu un otro hende? E otro hende si lo haya un reevaluacion?  E director di Departamento di Impuesto a bisa Hues cu tur hende ta wordo trata igual. Hues a remarca, pakico ora de Meza a paga y a pidi un carta cu el a cumpli, Departamento di Impuesto ta haci fastioso cu no por duna e carta ey.

   Director di Departamento di Impuesto a bisa Hues cu segun e ley di Impuesto (LIM) tin diferente peticion. Ora ta trata di peticion pa nombramento di un minister, un comerciante entre otro, e ta otro compara cu un hende normal. Señora Gomez-Pieters a bisa Hues cu nan mester atene na e ley (LIM) cu ta stipula con mester atende cu peticion pa declaracion di Belasting.

   Hues a bisa cu den e caso aki, e pregunta ta bin si e ta un caso caso contra un decision di Gobierno cu ta cay bou LAR of un carta cu mester cana un otro procedura. Departamento di Impuesto ta haya cu e carta no ta un decision sino informacion na Formador.  mr. Croes y mr. Duijneveld ta mira cu esaki ta un decision di Gobierno.

   De Meza a bisa Hues cu el a paga tur su debe y a pidi Departamento di Impuesto un carta cu el a cumpli pa asina entrega e carta na Minister Presidente y tambe pa e mes como politico pa por demostra cu e no a keda sin paga belasting.

   Hues a bisa cu e no por bay bisa cu Departamento di Impuesto mester duna carta positivo pa cu de Meza. El a splica cu e por bisa cu por declaracion di Departamento di Impuesto no admisibel y ordena pa traha un carta nobo. El a bisa cu esaki lo haci cu e proceso lo dura mas hopi. Hues a bisa e ta bay evalua e caso y dia 4 Juni 2025 lo tin un decision.