Gobierno ta bay cuminza promove evento ‘Ban den Caya’

ORANJESTAD (AAN): Diaranson mainta, Prome Minister mr. Mike Eman, hunto cu Minister di Finansa y Economia mr. Geoffrey Wever y

Minister di Turismo mr. Wendrick Cicilia, a tene un conferencia di prensa na altura di Penha den cual a anuncia e proyecto piloto “Ban den Caya”.

  Ministerio di Asunto General, Ministerio di Economia y Ministerio di Turismo, hunto cu ATA y varios otro stakeholder, ta lansa “Ban den Caya”, un evento cultural semanal cu e meta pa reinventa Caya Grandi como un hotspot vibrante di cultura, creatividad y orguyo Arubano. E prome edicion lo tuma luga dia 6 di juni 2025, di 7’or di atardi pa 10’or di anochi, y lo sigui tur diabierna anochi te 29 di augustus 2025, cubriendo un total di 13 edicion.

  Segun Prome Minister Eman, e obhetivo principal di “Ban den Caya” ta pa duna Caya Betico Croes un imagen nobo como curason cultural di Oranjestad, na unda cu lo tin un cantidad di kiosko, productonan artesanal, baile y un sin fin di actividad tipico cu lo yuda identifica Aruba su herencia cultural. Esaki cu e meta pa trece movecion back den Caya Grandi y hunto cu e comerciantenan den e area y restaurantnan, duna e publico un experencia autentico combina cu un shopping night. Prome Minister Eman mes a pasa personalmente den cada negoshi den Caya Grandi pa invita nan pa participa den e actividad “Ban den Caya” cu lo trece ambiente y un experencia unico di shopping riba diabierna anochi. “Nos ta bay identifica Aruba atrobe cu tur nos herencia cultural pero tambe cu cosnan innovado pa duna caya un toke renoba”.

   Minister Geoffrey Wever a indica cu e proyecto piloto aki ta forma parti di e vision di Gabinete AVP-Futuro pa revitalisacion di Oranjestad. Esaki ta parti di e totalidad pa rescata nos edificionan historico, crea bida den caya y transforma nos centro di ciudad den un area vibrante. Minister Wever tin algun tempo caba ta carga e vision di revitalisacion y a percura pa revitalisacion di e area di Columbusstraat, parti di Wilhelminastraat. Minister Wever a anuncia cu conseho di Minister a aproba cu awo lo continua cu e ultimo parti di Wilhelminastraat y Klipstraat y haci esaki un centro culinario.

   “Ban den Caya” ta un invitacion pa conecta cu nos herencia, celebra nos talento y stimula un desaroyo sostenibel pa futuro. Cada edicion lo inclui: (*) Presentacion di musica en bibo, danza folklorico. (*) Performance art. (*) Mercado di arte y artesania manera productonan traha na man, arte visual, souvenirs y hopi cuminda y cos dushi local.  (*) Zona culinario cu ta ofrece cuminda local, food trucks, street food.  (*) Skina pa mucha cu wega.

   E lugarnan di entretenimento ta inclui Plaza Daniel Leo, Plaza La Linda: Food court / Stage principal y Plaza Nikki Habibe dilanti Djiespie’s Place y Chubato Beer World.

   Minister Wendrick Cicilia, ta mira e balor pa trece comunidad y turismo hunto den un actividad den cual ta celebra nos cultura y laga nan experiencia kico realmente ta haci Aruba unico. Hunto cu Aruba Tourism Authority, lo haci esfuerso pa trece turistanan den caya e anochi aki pa experiencia nos cultura y autenticidad a traves di aspectonan culinario, artistico y expresion musical y crea un ambiente vibrante y positivo den Caya Grandi. E evento ta pa crea sinergia entre turistanan y localnan den un celebracion di e cultura y tradicion Arubano. Nos localnan por expone e turistanan na e costumbernan di nos pueblo, nos musica vibrante y ambiente autentico Arubano, y tin e oportunidad pa haci compras durante e anochi di celebracion.

   "Ban den Caya" no ta solamente un evento; e ta un movimento pa duna nos centro di ciudad bida nobo y uni pueblo den orguyo y creatividad. Sea parti di e experiencia y celebracion di nos cultura.