ORANJESTAD (AAN): Riba Diaranson, Hues Comisario a sigui atende sea prolongacion of liberacion di sospechosonan den e investigacion grandi di Caso Avestruz.
Siman pasa caba, Hues Comisario a libera Leoncita Arends, Franklyn Avath, y Freddy Every. Pero siman pasa e comerciante Pieter Susebeek si a keda deteni pa investigacion sigui.
Riba Diaranson 2 di Juni 2021, Hues Comisario a rechasa e peticion pa suspende detencion di e sospechoso Pieter Th.A. Susebeek. E sospechoso aki a pidi anteriormente pa suspende su detencion. Esey nifica cu por lo pronto, Susebeek ta keda tras di trali.
Manera ya DIARIO a trece caba den edicion di Diabierna mainta, hecho ta cu Diahuebs 3 di Juni 2021, Hues Comisario a duna ordo pa prolonga detencion di Benny Sevinger. Ministerio Publico aki den su relato a describi esey como “a duna ordo pa detencion (bewaring) di e sospechoso O.B.S. riba peticion di Ministerio Publico.”
Tambe DIARIO a mustra tambe cu e casa di e sospechoso aki, esta Sra. Claudia M.C.H. a worde poni den libertad. Ministerio Publico a ripiti cu señora Claudia tambe lo keda sospechoso den e caso.
Durante e siman di 31 di Mei te cu 4 di Juni 2021, ta varios testigo a worde scucha door di funcionarionan di LandsRecherche den e investigacion di Caso Avestruz.
