Gregorio Wolff:
ORANJESTAD (AAN): Gregorio Wolff, ta indica cu e sentencia di 1 juli 2025 ta pa directiva di CAPA duna na comision 11, e registro di miembronan di CAPA. Di acuerdo cu statutonan di CAPA, directiva a nenga di hacie y cual ta motibo pa comision 11 bay corte. CAPA ta un Cooperativa di miembronan di SEPPA.
CAPA tin + 1500 miembro y e miembro por spaar placa y ricibi un interes hopi biaha mas halto cu Banco Priva y ora di necesidad, e miembro por fia te cu 25 mil florin cu interes mas abao.
Un cooperativa ta un asociacion di hendenan, kendenan pa un o mas motibo ta lanta e asociacion pa coopera cu otro y busca bentahanan comun. E forma di coopera aki ta un organisacion habri pa miembronan por coopera cu otro, unda nomber, adres, telefoon y awendia e formanan digital mester ta disponibel na tur miembro, pa coopera y comunica cu otro, ora ta necesario.
Pa e motibo ey CAPA tin e articulo 30 den statutonan, unda e registro mester ta disponibel pa miembronan. Esaki Juez a mustra tambe. Durante tratamento, Juez a bisa cu e no ta bay obliga directiva yama un reunion General pasobra den e statutonan ya tin e opcion ancra con pa yama e reunion general, uzando e registro di miembronan y articulo di statutonan nr 21, lid 4. Miembronan por yega na un cantidad di firma pa obliga directiva yama e reunion pa duna cuenta di e ladronicia di F 382.000,=. Si directiva no hacie e miembronan mes ta yama e reunion y tur desicion ta legal.
Hues a mustra cu directiva di CAPA claramente a nenga di aplica statutonan. Esaki ta un violacion di e constitucion di CAPA. Pa tur miembro sigur pa e lidernan, aplicacion di Statutonan ta algo sagrado y violacion ta un delito pisa, cual ta motibo den e caso aki pa raya e directiva for di CAPA. Acerca e nengamento aki ta indica algo hopi fishy a sosode. Directiva kier tapa cos den e ladronicia aki di F 382.000,=, cual ta placa di miembronan di CAPA. No ta ladronicia di dosplaca, ni di un florin!!!
Preguntanan cu miembronan kier contesta
Magaly Brito como Tesorero di CAPA, si e mesun Secretario General di SEPPA, e persona cu ta responsabel pa un bon maneho financiero den CAPA, den reunion general a bisa cu un banco local lo bay paga e F 382.000,=, pero comision 11 tin e veredicto di Juez, den cual Juez ta bisa cu e banco no tin nada di haci cu e ladronicia. Berdad por ta, cu tin algun trahador di e banco cu ta amigo(a) di e sospechoso principal, pero e banco no ta envolvi. CAPA a perde e caso mahos contra e Banco.
Ariba e pregunta di con ora a tuma e sospechoso principal den servicio no a haci un antecedenten-onderzoek na Ministerio Publico, manera ta normal ora un persona bin traha na un Instituto Financiero, Sra Brito a contesta cu esaki a “Escape"nan, esta como lider di un instituto financiero nan a lubida cual ta otro delito.
No tabatin debido informacion di e Tesorera den reunionnan general na 2023 y 2024. No Por Nos sa cu tabatin un investigacion di PG, tambe un Investigacion Forensico, tur sin cu
Doñonan di e placa=miembronan di CAPA por a wak, corda lesanan .
Directiva debe miembronan informacionnan
Tin como 7 casonan den corte contra otro personanan envolvi den e ladronicia. Directiva no a duna ningun informacion, ni di e caso perdi contra e banco local.
Kico a pasa cu e tokennan?
Con a para cu e investigacion di O.M?
Con a para cu e Investigacion Forensico, doñonan=miembronan di CAPA por lese?
Lo tabatin un negligencia “Intencional” di parti di directiva, causa pa Amistad, pa no pidiun antecedenten-onderzoek di O.M., ora ta tuma personal den servicio, anto di un persona cu antecedencia malo di ladronicia? Di con a tarda asina hopi pa ricibi e veredicto contra e malhechor, mas cu un aña despues cu a descubri e robo, di sept 2022 pa okt 2023?
Di con a tarda como 6 luna, okt 2023 – april 2024, pa “beteken” e vonnis?
Ki dia ta splica e 10 casonan den corte?
Tur ta preguntanan cu doñonan =miembronan di CAPA, kier sa di e directiva di CAPA.
Sigur ta cu e interes cu miembronan ta ricibi ariba nan spaar pa e aña di ladronicia, tabata algun percentahe menos. Claramente miembronan a keda perhudica dor di e ladronicia, Wolff a indica.
