Ivo Valdez, presidente di OPPA:
ORANJESTAD (AAN) – Ivo Valdez, Presidente di e Organisacion di Pensionadonan (OPPA), tambe a duna un presentacion den e Foro Nacional pa Adulto Mayor.
Den entrevista cu DIARIO el a resumi kico el a menciona den e foro, indicando cu locual ta concerni na e atencion pa nos grandinan ta un realidad, cu no ta toca gobierno so, pero e ciudadano mes.
Pesey tabata tin tur e gremionan presente, y otro instancianan, pasobra hunto nan tin cu soluciona of bin cu solucionnan pa atende cu e situacion of cambia esaki.
“Den mi presentacion mi a menciona e ciudadano tambe, pasobra no por ta asina cu mi mayornan a cria mi cu asina tanto pasenshi, anto diripiente pasobra nan a bira grandi, mi ta dump nan na un lugar, y mi no ta bay wak of no ta dedica tempo na nan. Esey no ta locual nos ta na Aruba. Nos mester cuida nos grandinan te na ultimo. Y ban spera cu hopi hende y tur esnan cu ta siguiendo riba e medionan, concientiza y bisa cu enberdad nos tin cu cambia nos actitud pa cu nos grandinan”, Valdez a señala.
Valdez a reitera cu di un caminda mester crea un fondo pa bin cu un solucion pa e sobrevivencia di hopi di nos grandinan. Por ehemplo den e sentido di vivienda cu no ta accesible pa hopi di nan.
“Un par di luna pasa nos tabata den un comision pa traha pa trece paz entre SABA y gobierno. Mi tabata tin hopi reunion cu diferente instancia y tur tabata tin di haber cu vivienda, pa e persona cu tin mester di cuido medico no ayera, pero na e momento ey.
Anto nos falta e localidad ey. E localidadnan cu ta existi no tabata cumpli cu e exigencianan cu Inspectie tabata kier pa tin. Anto riba esey tambe nos tin cu traha y te hasta si bin vivienda nobo, ban tene cuenta cu e necesidad di e grandi”, Ivo Valdez a indica.
El a agrega cu e hende jong no tin cu dicidi con e grandi tin cu biba. “Dicidi pa bo mes; si bo ta pretende cu bo por dicidi pa bo mes, dicidi pa bo mes; pero duna e grandi e oportunidad pa dicidi tambe con e kier biba su ultimo fase di bida. P’e ta hopi importante. Bira grandi no ta problema, pero con bo ta bira grandi”, Valdez a señala.
