ORANJESTAD (AAN): Señora Tisa LaSorte, CEO y presidente di AHATA tambe tabata presente den conferencia di prensa di Crisis Team,
na unda el a reitera cu hotelnan ta reportando un aumento di cancelacion debi na nivel cora di CDC pa motibo di e ola di Covid.
Segun LaSorte, ta obvio cu na momento di pasa den e olanan aki e tin su efecto. E ta afecta nos economia, nos trabao, nos entrada, como tambe un presion grandi riba Hospital, cu ta causa un efecto negativo riba cuido medico cu por ta disponibel na tur hende.
Tur hende mester haci di nan banda y participa den e solucion. E pandemia ta manera un guera, esaki ta un guera mundial, y cada persona mester participa den e solucion. E unico solucion ta vacuna.
Tin suficiente datonan y awo e estadistica ta demostra cu vacuna ta haci un diferencia. Bo por proteha bo mes como tambe esnan rond di bo.
LaSorte ta haci un peticion, specialmente pa dunadornan di trabao, pa encurasha nan empleadonan pa bay vacuna. Tur famia encurasha nan miembronan di famia cu ainda no a vacuna pa bay participa den e Vacunathon di diadomingo awo.
Ritz Carlton ta asina bon di permiti pa haci uso di nan Ballroom pa un Vacunathon. Esaki ta haci cu e vacuna ta mas accesible pa cada persona na Aruba. E vacuna ta gratis, no tin motibo pa no tuma e vacuna. No tin otro pais na mundo cu ta vacuna nan poblacion den un Ritz Carlton.
Señora LaSorte ta pidi pa esnan cu ainda no a vacuna pa haci uso di e oportunidad aki y encurasha otronan pa bay vacuna y asina yuda proteha nos comunidad economicamente como tambe nos salud.
