ORANJESTAD(AAN): Diaranzon Fundacion Telefon pa Hubentud a tene un conferencia di prensa unda cu Director James Sneek
a trece dilanti cu Telefon pa Hubentud ta buscando miembro pa su asina yama Jongerenraad.
E fundacion a wordo funda na 1999 y desde e tempo ey Telefon pa Hubentud ta duna ayudo tur dia via di e telefon 131, 131App y 131.aw na e muchanan y hobenan di Aruba.
Gratis y anonimo e muchanan y hobenan di Aruba ta tuma contacto cu Telefon pa Hubentud pa papia tocante nan sintimentonan.
Sneek a splica cu banda di e ayudo via telefon 131, 131App y 131.aw, Telefon pa Hubentud ta duna charla, workshop y proyectonan den scolnan, clubnan deportivo y otro lugarnan cu mucha y hoben sa bishita.
“Telefon pa Hubentud tin como meta pa duna nos muchanan y hobenan informacion pa asina cu e informacion aki nan por tuma mihor decisionnan den bida”.
Asina aki nan por para pa nan derechonan, cumpli cu nan debernan y desaroya nan talento, segun e director.
El a sigui bisa cu Telefon pa Hubentud ta un organisacion cu ta traha pa y cu mucha y hoben y ta kere cu mucha y hoben mester tin participacion den e decisionnan di e organisacion. Pa e motibo aki Telefon pa Hubentud na aña 2018 a incorpora un ‘Jongerenraad’ den su organisacion. E ‘Jongerenraad’ di Telefon pa Hubentud ta duna conseho na e organisacion y ta yuda tuma decision tocante cambionan grandi y desaroyonan ariba temanan di mucha y hoben.
Actualmente e ‘Jongerenraad’ ta consisti di 3 hoben entre 11 y 24 aña y ta buscando 2 hoben mas pa bira miembro di e ‘Jongerenraad’ di Fundacion Telefon pa Hubentud Aruba.
Sneek a splica cu e hobennan mester tin motivacion, creatividad, ta open pa comparti nan pensamento, interesa den e hubentud di Aruba y por participa den diferente actividad.
Den cuadro di esaki Telefon pa Hubentud a start un campaña pa recluta 2 hoben.
