Hotel Secrets na Sero Colorado lo bay habri fin di 2024

Prome Minister Evelyn Wever-Croes:

• Epoca nobo ta bay cuminsa pa San Nicolas 

ORANJESTAD (AAN): Minister President Evelyn Wever-Croes a reuni cu desaroyadornan di hotel Secrets na San Nicolas. Desaroyadornan tabata tin e bon noticia cu nan ta trahando pa keda cla cu e prome fase di e hotel pa fin di e aña aki, 2024.

   Un total di 300 camber ta habri fin di 2024 y e demas cambernan ta worde construi den Fase 2 cu 300 camber na 2026, y den Fase 3 cu 300 camber mas na 2028.

   Esaki ta un noticia hopi positivo pa San Nicolas y pa Aruba. E hotel aki lo ta e prome hotel grandi pa San Nicolas y cu lo genera un desaroyo grandi pa San Nicolas y pa esnan cu ta biba pariba di burg. “Esey tabata nos compromiso cu San Nicolas, pa trece bida back den San Nicolas, y nos ta logrando”, Minister President Evelyn Wever-Croes a accentua.

   Epoca nobo pa San Nicolas: Pa Gabinete Wever-Croes II,  desaroyo di San Nicolas ta un prioridad y p’esey ta traha duro pa logra yega na un solucion pa cu e proyecto aki. Prome Minister a indica cu pa Gobierno e proyecto aki ta uno di gran beneficio mirando cu e lo crea oportunidad laboral y un crecemento economico pa Aruba na San Nicolas y vecindario. Tambe, Gobierno ta invertiendo hopi placa den embeyecemento di diferente area incluyendo Baby Beach y Rodgers Beach.

   Un otro desaroyo importante pa San Nicolas ta e World War II Memorial cu lo ta na Sero Colorado y cu lo atrae hopi bishitante pa e parti aki di nos isla, combina cu un bishita den centro di San Nicolas. E proyecto aki lo keda cla na mita di e aña aki.

   Tambe tin e trabaonan den Mainstreet San Nicolas, cu lo cuminsa e prome kwartaal di 2024. Y e esfuersonan cu ministernan di Economia y Naturalesa ta haciendo pa trece un desaroyo den centro di San Nicolas. Tur esakinan ta un muestra di e compromiso cu Gobierno tin cu Aruba y principalmente cu e habitantenan di San Nicolas.

   Bon cu SNBA: Gobierno tin un bon colaboracion cu San Nicolas Business Association pa realisa e proyectonan aki y mas proyecto cu SNBA ta acelerando pa realisa pronto.

“Nos ta convenci cu e tipo di desaroyo aki tin hopi potencial y oportunidad di crecemento pa Aruba y San Nicolas. Pa e motibo aki, lo sigui lucha pa logra na haci tur e proyectonan aki un realidad. Esaki ta nos compromiso cu Aruba y San Nicolas", Prome Minister a expresa.