Dirigentenan nobo di Hulanda tambe lo topa cu e cara di exito di Aruba!
*mr. Evelyn Wever-Croes cu un reto historico nobo pa dirigi OCTA
*E recuperacion di Aruba ta modelo pa hopi ex colonia Europeo awe
ORANJESTAD (AAN) — Te awe historia ta mara Aruba na 12 pais cu historia a uni pa medio di e epoca colonial den historia.
Colonialismo ta un realidad for di momento cu hende a haya existencia.
Desaroyonan den tempo moderno a crea e Europa cu nos conoce awe y cambionan di poblacion mundial, produci pa un gran parti pa e e hecho cu Cristobal Colon a descubri cu mundo no a caba na e otro banda di Oceano Atlantico.
“Teritorionan di e otro banda di Laman” ta e grupo di pais, di cual Aruba pa su historia moderno tambe ta forma parti y cu ta resultado di e epoca di conkista Europeo.
Nan a uni den e organisacion OCTA, cu awe conoce 13 miembro y cu anualmente ta bini hunto pa entre otro eligi un Presidente, cu na 2024 a bira e Ministro Presidente di Aruba, mr. Evelyn Wever-Croes, cu a acepta e posicion na momentonan sumamente importante debi na e momentonan historico cu mundo ta enfrenta.
Prome Ministro di Aruba, mr. Evelyn Wever-Croes, lo presidi e organisacion cu lazonan importante cu Europa, cu manera DIARIO for di 2023 a mustra, lo bay urna electoral pa eligi gobernantenan nobo den e epoca di cambio mundial.
Di 6 di Juni pa 9 di Juni 2024, Union Europeo ta vota den su prome eleccion directo for di momento cu Gran Bretaña, a bandona e seno di e union di paisnan, cu na 2024 a haya un importancia cu a haci, cu paisnan cu no tabata miembro, a pidi pa nan afiliacion despues di e Guera di Ukraine.
Den tur sentido, 2024 no ta facil riba ningun tereno y atrobe destino na pone Prome mr. Evelyn Wever-Croes na mando di un union di hende, di pueblo, na un momento mundial sumamente dificil marca pa guera y problema.
Como Presidente di OCTA, sin duda mr. Evelyn Wever-Croes ta enfrenta un reto mas grandi cu hopi otro presidente di e organisacion, a yega di confronta ya cu mester papia di surgimento di situacionnan mundial nobo, cu ta exigi liderazgo sumamente fuerte na interes di tur cu ta forma parti di e organisacion.
Historia atrobe a pone mr. Evelyn Wever-Croes den un posicion, den cual e mester ta modelo pa otro miembronan di OCTA, dirigentenan na un mundo cu a bira reto pa liderazgo y decisionnan cu ta wordo tuma na paisnan.
E realidad aki sigur ta bini dilanti den e sosten financiero Europeo cu Aruba ta ricibi pa e proyecto E-government, cu ta papia di e necesidadnan importante pa aparatonan gubernamental por funciona den e epoca digital, cu demanda financiero enorme cu ta garantisa bon funcionamento di Gobierno pero tambe ta exigi pa pasonan wordo tuma pa henter comunidad por wordo sirbi segun sistemanan moderno.
Ora papia di E-government ta papia di fondonan necesario, los for di exigencianan nobo riba entre otro tereno financiero den mundo moderno, cu mas cu nunca mester di cooperacion, pa por sobrevivi e exigencianan enorme di epoca moderno sigur den gobernacion.
Na e momento cu mr. Evelyn Wever-Croes presenta su mes na mundo como dirigente di OCTA, comunidad internacional ta mira un lider cu a cambia realidad financiero, economico y social di Aruba, cu a conoce un fundeshi solido, pa por enfrenta futuro.
Un berdad cu mester wordo respeta tambe den seno di Reino Hulandes na e momentonan cu Prome Ministro Wever-Croes topa cu no solamente Gobierno Hulandes pero tambe cu miembronan di Parlamento y Senado Hulandes pa atende cu e interes riba e fianza Hulandes pa Aruba pa motibo di e pandemia di Covid-19.
Di e forma aki e dirigentenan politico Hulandes, cu ainda mester yega na formacion di un Gobierno nobo, lo topa cu Prome Ministro di Aruba, Evelyn Wever-Croes cu a bira cara di e logro y exito financiero, economico y social di Aruba.
Un generacion politico nobo di Hulanda mester dicidi, si ta permiti e forma cu Gobierno Mark Rutte 4, a trapa riba e contenido berdadero di Statuut cu ta honra y exigi e bon gobernacion di e gabinete dirigi pa Prome Ministro Evelyn Wever-Croes, Presidente nobo di OCTA cu lo por disfruta di e inspiracion y ehemplonan di e lider di Gobierno di Aruba.
