Hotel local a gana titulo di ‘Small Caribbean Hotel’ di aña

ORANJESTAD (AAN): Recientemente DIARIO a tuma nota cu e Hotel cu ta situa riba e tereno cu tur hende conoce antes como Plantage Tromp na Bakval,

unda tabatin un plantacion di palonan di coco, a logra gana un premio special como Hotel Chikito di Aña.

   Boardwalk Boutique Hotel Aruba ta un di e ganadornan di e Travel Awards 2024 di Caribbean Journal, pa obtene e titulo di Small Caribbean Hotel di aña.  E huradonan a bisa: “Bo por pasa un siman aki y no haya ni un solo defecto. Asina di meticulosota aki e compromiso cu hospitalidad, un luga caminda tur cos ta asina agradabel, asina bon haci, asina creativo cu pa bay cualkier otro hotel tin mester di un ahuste chikito. E coleccion di casita den un oasis exuberante cerca di Palm Beach na Aruba ta asina bon.”

    E di 10 edicion aki di Caribbean Travel Awards di Caribbean Journal ta un celebracion regional di biahe y turismo, cu ta reconoce e persona y e luganan cu ta contribui n’e asombroso exito di Caribe – y ta sigura cu e continua, desde e miho hotelnan di e region na su principal ehecutivonan di turismo n’e islanan cu ta distingui den field manera cuminda, romance, sostenibilidad y innovacion, segun loke ta seleciona p’e ekipo editorial di Caribbean Journal.

   Boardwalk t’e unico hotel di Aruba cu ta figura riba e lista di e aña aki, mientras cu Aruba a gana e premio ‘Honeymoon Destination of the Year’.

    “Nos ta encanta, honra y complaci di ricibi e premio aki di e publicacion mas informa ora cu ta trata di hospitalidad di Caribe,” ta loke Kimberly Rooijakkers, director y co-propietario di Boardwalk Boutique Hotel a bisa.