Hospital y Stichting BOB Aruba a firma un acuerdo hopi importante

Meta primordial ta sigui traha riba prevencion y deteccion na tempo

ORANJESTAD (AAN): Siman pasa, esta dia 17 di oktober tabata un momento hopi special pa Stichting Bevolkings Onderzoek Borstkanker Aruba (Stichting BOB) y Horacio Oduber Hospital (HOH). A traha pa hopi tempo riba un acuerdo cu lo trece un cambio sumamente positivo pa pashentnan cu cancer di pecho y e servicio di cuido medico cu nan ta haya.

   Un acuerdo pa mehoramento: E acuerdo cu Stichting BOB Aruba a cera cu HOH ta un acuerdo cu ta duna Stichting BOB e oportunidad pa ricibi resulltado di e pashent. Di e forma aki nan por haya sa ora cu nan manda un pashent pa chekeo na HOH si en berdad esaki tabata necesario y tambe ki e diagnose ta.

   Por ehempel si a constata cancer si of no, ki tipo di cancer a ser constata y den ki fase e pashent ta. Pues, e acuerdo aki ta yuda drecha e calidad di screening di banda di Stichting BOB pa asina por yuda e detecta cancer mihor.

   Prevencion y deteccion na tempo: Na roos bisti den cuadro di ‘pinktober’ p’e sr. Jacco Vroegop, Director di HOH, a expresa cu ta sumamente positivo cu Stichting BOB ta ubica asina cerca di hospital cual ta bon pe cooperacion y pe pashent. ‘Awe nos ta na Stichting BOB pa firma un acuerdo cu ta sumamente importante. E fundacion ta manda pashent pa worde diagnostica na Hospital pero informacion no ta yega back cerca nan pa informa si a constata cancer di pecho of no pa motibo di privacidad di pashent.

   Cu e acuerdo nobo aki, HOH lo duna nan acceso na e informacion p’asina Stichting BOB por haya sa cua ta e proceso di e pashent y asina nan por conecta back pa un miho servicio na pashent’, segun Jacco Vroegop.  Ademas, por siña di dje y mira unda por mehora deteccion y alavez lo tin mas data pa haci comparacion y analisis. Meta principal ta sigui traha riba prevencion y deteccion na tempo pa por atende cancer di pecho mas miho y mas lihe aki na Aruba.

   Tocante Stichting BOB Aruba: Manera tur hende sa, luna di october ta e luna cu nificacion hopi importante pa Stichting BOB, no solamente pasobra nan ta haci screening di cancer di pecho pero tambe den e luna aki a planta e simia na aña 2009 na momento cu e Mamma Poli di HOH a inicia su servicio.  E tempo ey señora Vanessa Williams, kende ta radiologo y co-fundadora di Stichting BOB Aruba, a cuminsa busca mas hende y stakeholders cu tin interes pa cuminsa cu e screening di cancer di pecho na Aruba. Na october di aña 2012 a funda Stichting BOB Aruba na un notario. Pues, segun dokter Williams, ki luna mas festivo cu oktober pa firma un acuerdo bunita asina. “E acuerdo cu nos a firma cu Hospital ta uno cu mester a pasa hopi tempo pasa caba, pero awo e ta un hecho cu ta duna nos un chens pa haya resultado di e ‘follow up’ di e personanan cu nos a manda Hospital. Pues e ta yuda nos drecha e calidad di screening.

   Un paso pa dilanti den loke ta detection tempran di cancer di pecho y un momento bunita y festivo cu sigur lo trece e dos organizacionnan aki mas cerca di otro. Nos ta contento y nos ta sigui traha riba mas colaboracion pa un miho calidad di cuido pa comunidad di Aruba henter.