Lenny Geervliet, Lider Proyecto 125:
ORANJESTAD (AAN) – Lenny Geervliet, Lider di e Proyecto liña 125 pa adulto mayor, a sigui elabora den entrevista cu DIARIO, tocante e necesidad di boluntarionan cu tin pa yuda den e proyecto aki.
El a subraya cu nan ta pidi compromiso, y e training tambe ta pa wak si, di ambos banda, ta algo pa e (aspirante) boluntario, y pa esaki tambe evalua si ta algo cu e lo gusta haci.
Encuanto edad, e mester ta un hende madura y si e tin afinidad cu adulto mayor, si e tin pasenshi, y e gana di haci un diferencia den e bida di otro persona.
El a comenta tambe cu pa locual ta yamada, nan ta na un average di tres pa cuater yamada pa mainta, y den un par di ora e ta basta. Tin tambe un par di hende cu ta yama mas frecuente; hende cu a establece un relacion cu e boluntarionan, y nan ta yama combersa di loke nan ta haci, of un problema cu nan tin of otro topico.
Tambe e trabao aki ta rekeri di seriedad. E persona no mester tin un estudio hopi halto pa haci e trabao aki, pero si amor pa e persona cu ta na e otro banda di e liña. Y e mester haci e training pa e sa cu e ta full otro manera di comunicacion.
Entre nos grandinan tin hopi problema social, entre otro aislamento. “Imagina bo un hende cu semper a haci su cosnan riba su mes, y diripiente docter ta bise cu su bista, su oido of algo otro a bay asina hopi atras, cu su situacion di salud no ta duna mas pa core auto, anto esey ta un caida hopi grandi pa nos tur. Imagina bo cu bo no mag core auto nunca mas. E ora ey bo ta cuminza depende di hende. Si bo tin hendenan na bo nivel social, na bo famia, ta otro. Pero e ora ey bo ta bay ripara cu tur hende tin pura. Esey ta un cos cu hende grandi ta ripara”, señora Geervliet a indica.
