Hospital ta organisador oficial di Copa Gubernamental y Comercial 2025

E siman aki weganan di softball ta start

ORANJESTAD (AAN):  Recientemente den un sala yen di hungado di softball di diferente instancianan gobernamental y alabes organisacionnan comercial a tuma luga un conferencia di prensa pa anuncia e siguiente Copa Gubernamental y Comercial 2025 cu lo inicia diahuebs awo 19 di juni na veld di Kudawecha. Horacio Oduber Hospital ta e organisador di e Copa e biaha aki y ta sinti’e sigur honra di a haya e oportunidad pa pone bek riba pia. Varios team lo participa y bataya durante 10 dia pa wak ken ta bay cu e copa di campeon riba 29 di juni proximo.

            Durante e conferencia di prensa, sr. Gregory Croeze kende ta miembro di Hunta di Directiva di HOH, a expresa na prome luga e honor cu HOH tin pa organisa e copa aki cual ya nan tin un aña ta traha duro pa por logra pone un campeonato grandi asina riba pia. Alabes tambe sr. Croeze a indica cu un di e motibonan principal pa sostene e tremendo iniciativa aki ta cu deporte ta algo bon pa salud fisico y mental; na final di dia miho salud bo tin menos persona lo mester di cuido medico.
            Dr. Dave Laclé representando e comishon di organisacion a gradici tur 12 team gubernamental cu a inscibi y tambe e 6 teamnan comercial cu ta cla pa bataya. No por a keda sin menciona palabra di gradicimento na Balashi como sponsor di e Cpa aki cu sin pensa a join e team di HOH pa forma parti di Copa Gubernamental y Comercial 2025.

            Despues di seis aña ta organisa e Copa Gubernamental y Comercial aki di softbal. E biaha aki, HOH tin e honor di organisa e evento aki cu lo tuma luga for di 19 di juni te cu 22 di juni cu ta e prome siman. Diahuebs lo inicia cu wega y diabierna lo tin e ceremonia oficial pa exactamente 7or cu lo sigui cu tremendo ambiente di Zeta Band. E weganan lo continua riba diasabra y diadomingo.

            E siguiente siman, e weganan lo sigui riba 24 di juni te cu dia 29 di juni. E clausura lo tuma luga  riba 29 di juni caminda e dos miho teamnan lo bataya pa bira campeon pa loke ta gubernamental y comercial y alabes lo tin tremendo ambiente di e banda local OREO.

            E invitacion ta keda na comunidad di Aruba pa pasa Kudawecha Ballpark di 19 pa 22 di juni y di 24 pa 29 di juni. E bar y cushina lo ta bon surti. Bishita e Facebook di Horacio Oduber Hospital of e pagina di evento di Copa Gubernamental y Comercial pa mas informacion tocante e schedule. HOH semper t’ey y den deporte nos tambe t’ey!