Azriah Palm, di Fundacion CVA ta splica:
ORANJESTAD (AAN) – Azriah Palm di Fundacion CVA Aruba, den entrevista cu Matutino DIARIO a duna di conoce cu Diahuebs 19 di Juni awo, ta bay tin un evento relaciona cu e “trend di vaping” cu ta tumando lugar na Aruba. E charla aki lo tuma lugar den Centro di Bario Playa Pabao, di 7’or pa 9’or di anochi.
Azriah a señala cu Fundacion CVA tin añanan ta trahando riba prevencion, y a dicidi acerca docter Becker, cu ta bay duna e charla cu tin e obhetivo di concientiza e comunidad adulto y hobennan.
“Si wak bon, cuanto hoben tin ta vape, cu kizas nan no ta wak e peliger, pero no ta worry. Pero esey no kiermen cu nos ta bay stop di duna informacion, kico e consecuencianan ta. Manera nos por lesa riba internet, kico e vaping por causa, ta loke nan ta yama ‘Pop Corn Lungs’ cu e pulmon ta hincha te rementa. Si bo tin sangramento, e ta bay stop coagula, e ta bira un prop cu por keda den bo pulmon, of si bay travel e por bay den bo curazon of hasta den bo cerebro”, Palm a subraya.
Pues, esaki tin un relacion indirecto cu vaping y atake cerebral. El a confirma cu esaki ta pasando na Aruba, si no CVA no ta bin cu e tema aki.
“Mi mes ta cana rond y wak muchanan y hende grandi cu ta vape. E tin saber den nan, y por wak cu paisnan grandi a cuminza bati alarma pasobra e ta birando un problema. Akinan tambe mi ta mira cu nos ta bay wak casonan. Con e situacion ta na Aruba? E cos ta cu na Aruba, nos Arubianonan ta bisa: ‘ah, si ta pasa mi ta pasa mi”, pero kico ta e consecuencianan? Si nos por preveni un grupo, ta bon. Pero esnan cu no kier tende of scucha, mañan tin cu sufri e consecuencianan, corda cu ta bo pulmon bo ta haci daño”, Azriah Palm ta alerta.
Pulmon ta e machine pa bo inhala, exhala, y si esey ta cuminza faya nos sa e consecuencianan, Palm a remarca.
