ORANJESTAD (AAN): Crisis Team tin varios siman ta alertando comunidad cu nan lo mester escala medidanan pa motibo di aumento di casonan di Covid.
Diabierna DVG a registra un record di 192 caso den un dia y no por a keda otro cu Hospital mester a escala pa asina sigui por brinda cuido.
Crisis Team a informa cu pa motibo di e aumento drastico di casonan di Covid, Hospital ta escala y mester cancela cuido electivo. Hospital lo atende solamente casonan di urgencia pa asina por traha capacidad y espacio pa atende cu pashentnan di Covid. Dr. Horacio Oduber Hospital ta lamenta cu mester a tuma e paso aki, sinembargo ta un paso necesario pa por garantisa cuido di tur ciudadano.
Crisis Team ta haci un apelacion riba tur ciudadano pa no acudi na Hospital pa cuido cu no ta di emergencia y cu no ta necesario mesora. Nan tambe ta urgi comunidad pa tur hende bay trankilo den trafico y evita causa accidente. Cada victima di accidente den trafico ta tuma mas cama den hospital.
Cu casonan aumentando cada dia y e situacion no ta estabiliza, Crisis Team ta evaluando ki paso mas mester tuma. Bay vacuna, cuida boso mes y boso famia.
