BELIZE CITY: Gobierno di Belize a confirma e siman aki, cu e barco crusero Carnival Vista a mara na nan waf cu 26 miembro di tripulacion, y 1 pasahero contagia cu Covid-19.
Desde cu e sector di cruise a habri bek na luna di Juli, e cantidad di bishita di barconan na e pais a cuminza poco-poco cu djis un barco ta mara pa siman na e waf di Belize City.
Hunta di Turismo di Belize a confirma cu Carnival Vista a yega cu casi 3.000 pasahero abordo, entre nan 26 tripulante y 1 pasahero cu tabata contagia cu Coronavirus.
Ministro di Turismo di Belize, Anthony Mahler, y su team di trabao a reuni virtualmente cu funcionarionan di Carnival Vista pa analiza kico e escenario ta causa pa e contagio.
E barco a bisa cu nan tin protocolnan estricto eyriba pa mitiga mas contagio di e virus, y a isola e hendenan cu tin e virus. Esey ta loke e Ministro a bisa prensa local.
El a bisa cu e Hunta di Turismo di Belize a determina cu esnan contagia no ta representa un menaza pa e huespednan abordo, y resto di tripulacion.
Hecho ta cu 99% di e tripulacion di barco a wordo vacuna, mientras cu 96% di e pasaheronan a ricibi por lo menos un dosis.
Belize tin un regla, cu nan no ta laga pasaheronan baha di un barco crusero, si acaso e cantidad total di casonan positivo ta riba di 2% di e cantidad di huespednan abordo. Pues despues di a bay inspecciona e protocolnan abordo di e barco, a duna OK pa e otro pasaheronan si baha y disfruta di e dia na Belize.
Desde cu pandemia a cuminza, Belize a conoce 14.672 pashent cu a bira malo di Covid-19, y di cual 344 persona a muri.
Un total di 57.498 persona ta completamente vacuna na Belize, cu ta supone ta 14,7% di nan poblacion.
