Horcan Ian a causa destruccion catastrofal den hopi area di Florida

ORLANDO: E destruccion riba parti west, central, y oost di Florida a keda hopi visible ora cu solo a sali Diahuebs mainta. 

Cayanan cu nunca antes a yega di inunda, awor ta impasable.  Hasta e toren di un Baptist Church cu ta keda na parti noordoost di Orlando.  Biento fuerte a kibra esaki, y a laga e toren di banda.

   Parti west di Florida, den area di Fort Myers e casnan banda di costa y cayanan a keda full inunda, caminda ta solamente cu boto bo por yega of sali di un cas.

   Tin algun cas cu ya no ta ni existi mas!  Solamente e fundeshi a keda.  Hopi area cu tin Mobile Home, tambe a keda atras cu destruccion.  Varios cas a keda intacto, pero ora habitante a habri e porta, a bin descubri cu dak ta yena cu buraco y paden ta basta yen cu awa.

   Loke ta mas impresionante ta e destruccion cometi riba Fort Myers Beach Pear.  Full e edificio, y infrastructura traha riba e Pier aki a desaparece den apenas par di ora.  Djis e palonan cu ta sali for di lama a keda ainda.

   Na Orlando: Tanto Walt Disney World, Seaworld, y Universal Studios lo keda cera awe Diabierna.  Esey ta pasobra nan lo bay tuma full un dia pa haci reparacion na tur daño cu a wordo causa door di Horcan Ian.

   Algun huesped cu ta kedando na Universal Orlando Resort, a bay cana rond atardi pa mira kico a pasa, y nan a nota cu tin hopi daño na e Jurrasic Park River Adventure, unda tin un buraco grandi den e edificio.  Tambe por mira algun rails di rides na Universal Studios cu a wordo kibra.

   Na Animal Kingdom a nota varios palo di mata benta abao.  Hopi resort na Disney World a sufri di daño di awa cu a leak paden.  Algun palo di borchi pafo di Magic Kingdom tambe a basha bin abao.

   Hopi turista na Orlando, na ultimo minuut a haya nan obliga di sali for di nan Hotel y a bay busca refugio den Shelternan.

   Walt Disney World a suspende nan sistema di reservacion, te cu aki algun dia prome cu nan por acepta hende bek.

   Un homber di 72 aña a fayece Diahuebs mainta net ora cu Horcan Ian ta pasando.  Pasobra cu cabez duro el a dicidi na sali pa bay haci e piscina di su cas bashi, pasobra esey a yena full y ta bashando over debi na awacero.

   Esaki a socede na Deltona, cu ta di Volusia County.  El a bira un di e dos victimanan di e Horcan Ian.  Gobernador DeSantis a indica cu e impacto di Horcan Ian ta uno historico, incluyendo e daño.

   Como 2.3 miyon hende na Florida te cu Diahuebs anochi ta sin coriente.   Aeropuerto di Orlando y di Tampa a keda cera, pasobra varios pista ainda ta bao di awa.  Si bo ta bishitando Orlando e siman venidero, ta vale la pena check bo reservacion.