Minister Dangui Oduber:
ORANJESTAD (AAN) – Den cuadro di Dia Mundial di Curazon, observa Diahuebs 29 di September, Minister di Salud y Turismo, señor Dangui Oduber a yama un conferencia di prensa. Tambe a hiba palabra Jasmira Mora Garces, coordinador POH y miembro di e Plataforma Promocion di Salud.
Na prome lugar gobierno a emiti un introduccion tocante e tema, unda a menciona cu e dia aki tin como meta educa y concientiza e comunidad tocante e malesanan cardiovascular, y con pa preveni esakinan y mantene un curazon sano y fuerte.
E Federacion Mundial di Curazon, cu apoyo di e Organizacion Mundial di Salud “OMS” y UNESCO a establece e dia aki na aña 2000, pa yuda anima tur hende, pa yuda cuida e salud cardiaco, y controla e factornan di riesgo cu por contribui na e desaroyo di malesanan cardiovascular.
Dangui Oduber, como titular di Salud, a bisa cu enberdad esaki ta un dia special unda gobierno ta para un rato den cuadro di concientizacion, pa recorda comunidad con importante ta, pa nos por tin un bida mas saludable y cuida nos mes miho, pa asina por reduci e factornan di riesgo.
E mandatario a señala cu henter e siman aki, gobierno a duna un atencion special na caminda pa e dia aki “Dia Mundial di Curazon” unda gobierno mes a pone luz cora na e edificio di Bestuurkantoor, Triple A y WEB Aruba NV, tambe a coopera pa alumbra nan edificio cu e luz cora aki, tur esaki den cuadro di educacion y concientizacion cu nos kier duna nos comunidad.
“Pa algun tempo caba, Gobierno a anuncia nos plan di prevencion cu ta den pleno ehecucion; un plan cu sigur nos a duna e atencion necesario na prevencion di salud, conhuntamente cu e Plataforma Promocion di Salud, hunto cu e stakeholders den salud”, e dignatario a indica.
E dignatario a referi na e Conferencia cu a wordo organiza e fin di siman cu a pasa, Diabierna, contra malesanan cronico, cu a resulta uno exitoso, cu varios diferente panel cu a wordo organiza door di expertonan riba tereno di prevencion, unda nan a comparti informacion cu esnan presente tocante kico, unda tur hunto, por haci pa tin un comunidad mas saludable y cu ta participa mas na actividadnan fisico y kico ta e maneho cu e gobierno mester hiba, no solamente pa tin un comunidad mas saludable pero tambe pa percura un bon maneho di e gastonan di AZV y garantiza cu e fondonan aki, ta keda sostenible.
