Horcan Erin creciendo rapido y awe ta pasa panort di St. Maarten

ORANJESTAD (AAN): Horcan Erin a nace riba Diabierna, y a bira e prome den temporada di 2025.

  Te cu Diabierna atardi 5:00 pm e ta uno di Categoria 1, cu biento maximo rond di su centro di 120 km/h.  Segun National Hurricane Center, nan ta pronostica cu e lo bay haya mas forza y crece rapido.

   Su centro e momento ey tabata na 18.9º Nort y 57.6º West.  Esaki ta exactamente 584 km Oost-Noordoost di Philipsburg na St. Maarten.  Horcan Erin ta moviendo awo West-Noordwest cu 28 km/h.

   Awe Diasabra for di mainta caba, cielo lo ta hopi nubla y por sinti yobidanan na diferente lugar na St. Maarten, Saba, y St. Eustatius.  Pesey mes e tres islanan aki ta poni oficialmente riba un Tropical storm Watch.

   Ta pronostica cu entre 5:00 pm pa 7:00 pm, e centro lo ta pasando basta cien kilometer panort di St. Maarten, pero e cobertura di nubia y awacero cu lamper y strena lo ta pasando tin biaha eyriba.  E suerte ta cu e Horcan lo ta pasando panort di e isla, ya cu semper e parti zuid di un Horcan no ta haya hopi molester, compara cu e parti panort.

   Segun National Hurricane Center, nan ta pronostica cu Horcan Erin lo bay bira uno mas grandi den siguiente dos pa tres dianan.  Nan a detecta cu biento cu forza di horcan ta extende 35 km leu for di e wowo.  Biento cu forza di tormenta tropical ta extende te cu 185 km di e centro, y principalmente esaki ta panort di e wowo.

  E maltempo aki no ta forma menaza pa Aruba, pero lo por spera cu ta bay bira calor den e dianan aki.