Hopi interes y participacion di publico durante ‘Contacto cu Bario’ di Elmar y DTI na Savaneta

ORANJESTAD (AAN): E compania NV Elmar a organiza un edicion exitoso di su sesion informativo “Contacto cu Bario” na MFA Savaneta,

cu un sala completo y participacion activo di habitantenan di Pos Chiquito, Savaneta, Cura Cabay, Brazil y San Nicolas.

   Contacto cu Bario ta un iniciativa anual di Elmar pa trece informacion relevante directamente na comunidad. Cada aña, e sesion ta tuma lugar na un otro MFA na Aruba. Dos aña pasa e actividad a wordo organiza na MFA Noord, aña pasa na MFA Paradera y e aña aki na MFA Savaneta, enfocando riba e comunidadnan p’ariba di brug.

   Un di e topiconan cu ta forma parti continuo di Contacto cu Bario ta e proceso di keuring di instalacion di solar panel. Pa e edicion aki, pa prome biaha Elmar a invita Directie Technische Inspecties (DTI) pa participa y comparti informacion cu publico tocante nan rol den e proceso di keuring y siguridad tecnico.

   E intencion no tabata pa presenta un sesion altamente tecnico, considerando cu e proceduranan tecnico ta wordo ehecuta door di instaladonan reconoci. En cambio, Elmar y DTI a brinda publico un miho comprondemento di e proceso y di aspectonan importante cu un cliente mester tene cuenta cu nan. Di e forma aki, clientenan por ta miho informa y prepara durante e proceso di instala y conecta un sistema di solar panel.

   Mirando cu nos ta den temporada di calor, Elmar tambe a dedica parti di e programa na consehonan practico pa spaar coriente. E sesion a conclui cu un espacio extenso di pregunta y contesta, cu hopi participacion riba solar panel y specialmente uzo eficiente di energia. E participacion activo di publico a crea un intercambio ameno riba diferente manera pa spaar coriente durante temporada di calor. E interaccion aki ta un di e metanan di Contacto cu Bario: comparti informacion, scucha clientenan, atende nan inkietud y mantene contacto directo cu comunidad.

   Contacto cu Bario ta forma parti di e programa continuo di Community Engagement di NV Elmar, cu ta inclui iniciativa manera Open Dag, participacion na expo y diferente actividad den comunidad. Mediante e iniciativanan aki, NV Elmar ta trece informacion util na publico y fortalece su contacto cu clientenan y comunidad.

   NV Elmar ta gradici DTI pa nan colaboracion y aporte, y tur e personanan cu a asisti na e sesion. E gran interes y participacion activo di publico a contribui na un edicion exitoso di Contacto cu Bario na Savaneta.