Hopi interes na Paradera pa haya sa mas di e plan pa duna mas placa na muchanan cu discapacidad

ORANJESTAD (AAN): Minister Wyatt-Ras, hunto cu Minister President Mike Eman,

a tene e segundo sesion informativo tocante e proposicion di ley pa sosten financiero pa muchanan cu necesidad di cuido intensivo, e biaha aki na MFA Paradera.

   E sesion a haya un hopi bon acogida di comunidad. Mayornan, famianan y otronan presente a participa activamente, haci hopi pregunta importante y comparti nan inkietudnan. E intercambio aki a brinda oportunidad pa aclaria duda, duna mas informacion tocante e proposicion di ley y tende directamente di e famianan tocante nan experiencia y necesidadnan.

   Durante e anochi, a brinda informacion tocante e sosten financiero di Afl. 500 mensual pa cada mucha elegibel, e rekisitonan y e proceso di peticion, semper den e contexto di un ley cu ainda ta den proceso legislativo.

   Un reconocemento special ta bay na Departamento di Asunto Social (DAS), particularmente Sra. Chanin Boekhoudt, na Sr. Wiebren van Dijk di Landspakket y na Sra. Jill Bangert, wetgevingsjurist cu a brinda sosten via Landspakket, pa nan dedicacion y contribucion na e desaroyo di e proposicion di ley.

   Durante e encuentro, tambe a duna reconocemento na Sr. Hans Kröber, autor di e buki Beperkt op Aruba. E catering tabata den man di Trampolin pa Trabao, cu ta brinda oportunidad di trabou na personanan cu limitacion.

Cu e sesion na Paradera, nos a conclui e dos encuentronan informativo na San Nicolas y Paradera. Nos ta gradici tur esnan cu a participa, haci pregunta y contribui na e dialogo. E participacion di comunidad ta importante pa compronde e necesidadnan di famianan y pa sigui traha riba sosten cu ta responde na nan realidad.