ORANJESTAD (AAN): Locual a keda raporta na DIARIO cu ta sosodiendo hopi na Aruba den e dianan aki ta cu tin personanan cu ta presentando sintomanan di Covid-19 y cu ta prefera di no bay test.
Tin hende cu parce ta haya entre otro cansancio y dolor muscular, fiebre, tos seco, dolor di garganta, dolor di cabez of batimento di curazon, pero cu ta bisa cu ta un griep nan tin y pesey nan no ta bay test.
Tambe tin personanan cu ta bisa cu pasobra nan no a perde smaak of nan olfato, nan no tin Covid-19. Pero mester corda cu e variante Omicron a trece cu ne cu e sintomanan tambe a varia y no necesariamente bo ta perde smaak of olfato.
Pesey ta aconsehabel pa yama docter di cas, solicita un codigo pa haci test riba arubacovid19.org of yama Departamento di Salud (DVG) na 522-4200 / 280-0101/522-4211.
Tin otro personanan cu ta haci self-test (test na cas) pero no ta raporta cu nan a sali positivo y toch no ta bay den isolacion. Esaki ta un otro situacion masha peligroso mes pasobra nan ta plamando e virus di un forma hopi iresponsabel.
Lo mester bin un manera pa por controla e casonan aki unda hende ta cumpra test na botica y despues ta bay cas pa realisa e prueba. Maske na botica ta bisa nan pa yama DVG si nan test positivo, tin cu no ta cumpli cu e peticion aki.
Grafico cortesia di: heraldo.es
