Husticia, Parlamento, Gobierno y Prensa conoce cuadro legal --- Formulacion di reglanan specifico di periodismo ta necesario --- Prensa no ta cumpli cu leynan actual cu ta proteha bida priva
ORANJESTAD (AAN)- Dos forma tin pa un comunidad funciona. Mundo conoce paisnan liber den cual ley ta dicidi pa tur hende y instancia y mundo conoce paisnan dictatorial caminda un solo persona of grupo ta dicidi pa tur hende.
Ora bisa cu “Aruba ta un Estado di Derecho” ta confirma cu Aruba ta funciona a base di e Orden di Ley, cu ta nifica cu ley ta dicidi pa tur hende y tur accion, sin distincion.
E “Estado di Derecho” manera Aruba ta, ta ciego pa tur poder falso y manipulacion di ley.
Den e sistema democratico, Husticia, Parlamento, Gobierno y Prensa mescos cu tur ciudadano, ta mara na ley.
Cu na e momentonan aki, kier bay traha un compilacion di Ley special pa Prensa, a bira necesario pa un situacion den cual hasta personanan cu ta yama nan mes “experto den ley’ kier manipula cu prensa pa haci y deshaci manera nan kier.
Na varios ocasion DIARIO a trece dilanti e ansiedad di ciudadanonan cu ta bira victima di periodistanan cu ta kere cu nan por haci y deshaci manera nan kier den un comunidad.
Tur ser humano na un pais liber ta wordo proteha pa ley. Pertenencianan material y no material di un ser humano ta wordo proteha!
Kico e cuadro di ley ta nifica pa cada persona cu ta biba riba Aruba enfrente periodismo?
Pa cuminsa, periodismo no a wordo introduci como arma pa un persona of un grupo di persona haya poder destructivo pa otro persona.
Periodismo a wordo introduci pa informa Pueblo, pa defende Pueblo y interes di cada ciudadano y hasta e ser humano cu no ta parti di e pais.
E derecho humano ta alma di periodismo.
Un hende mester ta bon informa pa e por haci uzo di su derechonan. E persona mester ta bon informa pa e por proteha y defende su mes contra crimen, contra menasa di enfermedad of calamidad, y pa e por funciona den un comunidad.
E derecho humano pues ta central den ehecucion di periodismo, cu mester tin e capacidad pa conoce e derechonan di un ser humano y no trapa riba nan pa su propio bienestar.
E ser humano tin derecho riba un bida priva. Un Polis no por drenta cas di un hende sin permiso legal. Un politico no por dicidi kico un ciudadano ta haci of no ta haci.
Prensa no por mishi cu propiedad di un persona, organisacion of cualkier grupo sin consentimento of motibo legitimo.
Prensa, ni cualkier otro instancia, por publica un portret sin permiso di e persona, a menos cu e portret aki a wordo entrega na prensa pa publicacion.
Un persona por demanda prensa pa publicacion di su portret, di portret di su famia, pa portret di su cas, di su auto, di su cacho den su cura di cas.
Si un persona a publica un portret riba Facebook, no por uza esaki den prensa, menos ainda pa ataca of despretigia un persona.
E persona a duna Facebook e derecho pa publica su portret pero no a duna otro hende permiso pa uza e portret aki.
Den e caso di Prome Ministro, abuso a wordo haci di su bida familiar cu a wordo uza na un forma cu ta kibra tur ley di periodismo.
E suceso cu a uza pa expone su bida familiar segun prensa, no ta mishi cu su calidad di trabou como Prome Ministro ni kiebra di un ley.
E informacion cu a entrega na Pueblo, no tin importancia pa di contenido di su trabou ni su posibilidad pa cumpli cu su encargo como Prome Ministro.
Den caso di e Prome Ministro e asunto a haya atencion. Pero continuamente por nota informacionnan cu ta mishi cu bida personal di hende y por tin resultado directo pa e hende envolvi.
Un ley no por stroba prensa funciona pasobra prensa ta mara na ley, cu na un pais democratico ta defensa di e comunidad.
