Hopi hende riba caya cu crusero di Disney Fantasy

ORANJESTAD (AAN): Diadomingo por a mira hopi movimento riba caya den ciudad, como cu un barco crusero grandi tabata di bishita. 

Por a mira hopi hende canando den Caya Grandi, como tambe den Havenstraat.

   Ta trata aki di e barco Disney Fantasy, cu a yega poco despues di 8’or na Waf di Aruba.

   E barco aki tabata e di cuatro cu Disney Cruise Lines a lanza, y ta nabegando desde 2012 caba.  E barco aki tin capacidad di como 4.000 pasahero, y su puerto principal ta Port Canaveral, cu ta keda como 70 kilometer pariba di Orlando, Florida.

   Riba su viahe actual, el a sali Diahuebs for di Port Canaveral banda di 4’or di atardi.  El a nabega 2 dia riba lama, te cu Diadomingo mainta el a yega Oranjestad.  Diadomingo anochi pa 10’or el a bandona Aruba rumbo pa isla di Bonaire unda e lo yega awe Dialuna.

   Diaranson e lo ta na isla di Antigua.  Diahuebs e lo ta na St. Thomas (US Virgin Islands), y Diasabra e lo ta na un isla priva di Disney na Bahamas.  Diadomingo 23 di Juli e lo yega bek na Port Canaveral.