Hopi hende pa mira San Nicolas su monumentonan y historia

Open Monumentendag

ORANJESTAD (AAN): Un multitud di hende tabat'ey Diadomingo henter dia pa admira edificionan historico y monumentonan den San Nicolas.  Esaki den cuadro di e di 2 edicion di ‘Open Monumentendag’ organiza pa Stichting Monumentenfonds Aruba hunto cu Departamento di Cultura.

   Pa medio di actividadnan, recoridonan den bus of na pia, speurtocht y presentacionnan, comunidad a siña un tiki mas di e historia di San Nicolas y haya e oportunidad di conoce algun di e casnan y monumentonan.

   E evento mes a start na Watertoren San Nicolas caminda a tene apertura oficial  cu un bunita presentacion dirigi pa Jhon Freddy Montoya, acompaña pa Maybelline Arends-Croes cu  coro Tutti Frutti y diferente agrupacion di baile.  Henter dia por a bishita Nicolaas Store, Uncle Louis Store, Cas di Famia Vorst na Caya Dick Cooper 15, Cas di Famia Hope na Caya Sint John 21, Misa Santa Teresita.

   Tambe tabatin exposicion Biba nos Herencia. Un proyecto di 2 aña cu diferente reto di fotografia, lo termina cu un exposicion durante e Open Monumentendag y un revista online crea pa e boluntarionan di e proyecto.