Si prueba PCR negativo ta obligatorio pa drenta Aruba: - ORANJESTAD (AAN) – Un pregunta cu ta cana den nos pueblo critico ta, con ta posible cu tanto turista cu ta drentando Aruba ta test positivo pa Covid-19?
Cu e posibilidad cu por ta cargando e variante Delta tambe. Esaki no obstante e exigencianan stipula pa Gobierno pa entrada di turistanan na nos Isla, manera e exigencia di un prueba di PCR negativo.
Tin ciudadano ta puntra si kizas tin un manera cu un ke otro turista por drenta Aruba cu un prueba falso di covid negativo of certificado falso di vacuna? Algo asina lo por scapa na e control di e autoridadnan concerni ora nan aborda avion of ora nan yega Aruba? Ta djis un pregunta cu tin den pueblo.
Pasobra si analiza tur e informacionnan cu DVG a bin ta dunando, y e director di ATA tambe, lo no mester a drenta ni un hende di afo cu covid, y segun un observador ta mas tanto ta hende di afo ta trece e virus pa Aruba, y na Aruba nan ta wordo sirbi den hotel, restaurant, tienda, unda cu nan bay pa nos localnan y eynan e contagio por bin.
Y por mira turistanan na caya sin tapaboca, canando den grupo. Hopi ciudadano na Aruba ta analiza e situacion aki y ta, simplemente, super preocupa, cu mas di cien caso average di covid registra pa dia, entre nan un porcentahe considerable ta turista.
Segun e observador mester exigi nan tambe drenta Aruba ya vacuna, y cu un certificado extendi pa un instancia di salud reconoci di nan pais di origen, manera ta tumando lugar den algun pais caba.
Pero e tristeza grandi ta cu hopi di e localnan cu ta interna cu covid a bin resulta cu no ta vacuna. No pa huzga nan, pero e observador ta yama nan “hende cabesura” cu ta bisa cu no ta kere den e vacuna y ta ripiti, manera lora, y kere locual algun hende ignorante ta bisa, comosifuera nan ta cientifico.
Cada un di e 113 personanan cu covid-19 a tuma nan bida, a keda claba manera un sumpiña no solamente den nan famianan, pero den e pueblo henter, y e pregunta ta keda “con nan a wordo contagia?” Kizas pa un familiar cu a bay fiesta sin pensa riba otro? Un welo, un wela, un tata, un mama, un omo of un tia, e madrina, etc., cu a haya bishita di e virus na nan cas?
Awo cu e situacion a bolbe bira dificil, ta parce cu hopi hende kier vacuna. Pues ohala hasta lo surgi mas demanda di vacuna pa wak si logra e tan anhela “herd immunity”. Tin indicacion cu mas y mas mucha di 12 aña bay ariba a bay vacuna tan pronto nan a haya cita, y cu e trend aki ta sigui e simannan aki. Kizas faltando poco pa e aña escolar habri, DVG lo por bin cu un di dos vacunathon, pa aumenta e porcentahe di studiantenan vacuna. Dios yuda cu lo ta asina, segun e observador.
