Miluska Sneek, President di Kidneys297:
ORANJESTAD (AAN) Opinion personal di señora Miluska Sneek, Presidente di Fundacion Kidneys297, ta cu e populacion di Aruba no kier bebe awa, pero ta scoge otro opcionnan manera juice y refresco cu ta contene mucho sucu.
“E ta algo cu a cambia door cu tin hopi, pero hopi, otro tipo di bebidanan y esey ta pone cu door cu bo tin escogencia na hopi opcion, bo ta laga awa un banda. Nos hende grandi, antes tabata bebe warapo traha cu awa cu tamarijn, lamunchi, cual tabata hopi mas saludable. Aworaki tin hopi bebida cu por ta tin hopi exceso di sucu, anto e no ta alimenta bo nada”, señora Sneek a menciona.
Cerca nos hobennan nan ta bebe menos awa cu hende grandi, y Fundacion Kidneys297 ta purbando di keda manda informacion riba su plataforma di facebook, nan ta parti awa y ta concientiza comunidad.
“Nos tin diferente foyeto y buki cu nos ta parti na scolnan, parti awa gratis, y keda indica esaki cu un cambio chikito, cu ta bebe bo awa tin cu keda di bo mes; mi por bisa bo mil biaha, pero e ta algo cu bo mes tin cu haci”, señora Sneek a señala.
Señora Sneek a menciona cu muchanan chikito di scol basico, nan mes ta cla pa bebe awa. “Pero si e mayornan ta duna nan otro tipo di bebida, por ta juice of refresco, cu tin un cantidad di sucu, ta pone cu e mucha mes no por haci nada. Den e caso aki, durante carnaval nan a regala scolnan basico un lugar pa e muchanan di klasnan chikito por yena awa, y e muchanan lo haci uso di esaki, ta solamente yene cu awa. Durante di scol e muchanan no mester di ningun otro bebida cu no ta awa cu ta tene nan saludable, cu mente trankilo y nan no ta haya un exceso di sucu cu no ta bon pa salud”, señora Sneek a indica.
