Aruba Lions preparando un gran Feria di Salud na comienzo di Juni 2023

ORANJESTAD (AAN): E organizacion social di Aruba Lions Club ta preparando un evento grandi di salud, cu lo tuma lugar riba e prome Diasabra di luna di Juni venidero.

   Magaly Dijkhoff-Arends kende ta secretaria di Aruba Lions Club, a indica cu nan ta ya completamente prepara pa e ‘Aruba Lions Club Health Fair 2023’ cu lo tuma lugar  na nan sede na Engelandstraat 11, cu ta situa net pazuid di Eagle Tennis Club.

   E proyecto aki ta bin den cuadro di celebracion di e 75 aniversario di e club sirbiendo comunidad.  Nan ta sigui di e forma aki cu nan proyectonan na beneficio di esnan den necesidad.

   E proyecto di salud aki ta destina specialmente pa esnan cu tin dificultad pa yega pa haci saminacion medico a corto plazo.  Nan a adopta e lema ‘Be Healthy, Be Happy’.

   E feria di salud aki lo ta riba Diasabra 3 di Juni 2023 na e sede di Aruba Lions mes, for di 9:00 am te cu 3:00 pm.  Meta di e proyecto ta pa mantene comunidad saludable riba e parti medico.  Den e feria aki, comunidad lo haya chens di haci algun chekeo na e feria di Lions Club.

   Lions Club a inclui enfoque riba e bista humano y diabetes, como cu nan ta importante pa keda eherce un bon control.

   Uno di nan ta chekeo di wowo haci door di un optometrista kende ta bay controla presion den wowo, saminacion pa catarata.  Un boluntario di Precision Eye Care lo tey presente cu su equiponan.  Tambe tin chens di haci chekeo di oido, y esaki ta wordo haci den edificio bisiña di FEPO, unda lo haci test tambe di sanger.  Tambe lo haci chekeo di cancer na pecho.

    Dilanti edificio di Aruba Lions mes lo tin e asina yama ‘Smile Mobile’, cu ta un unidad riba wiel bon equipa, unda lo bay enfoca riba reparacion di djente falso, y principalmente hacimento limpi di e djentenan ey.  Pues ciudadanonan por yega eynan cu nan djente falso y ricibi un limpieza y revision, cu posible reparacion.

   Pa varios aña caba Aruba Lions Club tin e proyecto di Smile Mobile cu ta yudando nos grandinan, na e.o. casnan di cuido rond di e isla.  Tur esey a wordo haci gratis pa e hendenan, pero e gasto di 7.000 Florin pico a keda encarga pa Lions Club.

   Magaly Dijkhoff-Arends a indica mesora, cu e actividad di Health Fair 2023 di otro luna na Aruba Lions Club lo bay ta gratis tambe.  Tur gasto lo ta den man di e organizacion social aki.

   E Feria ta dirigi pa atende esnan den mas necesidad.  No mester haci reservacion ni nada, pero percura pa bo yega na tempo pa pone bo nomber, pasobra si acaso tin hopi pashent pa mira e dia ey, lo bay pone un limite, pa asina nan por keda cla cu tur hende na tempo.  E evento ta di 9:00 am te cu 3:00 pm.

   Aruba Lions ta haci tur esaki posible, danki na eventonan cu nan ta tene pa recauda fondo y cu bondad ricibi di comunidad pa haci esakinan bira realidad.