Hopi hende a acudi na e exitoso Aruba Aviation Expo 2023

ORANJESTAD (AAN): Manera ta conoci, na Augustus venidero ta bay celebra un etapa importante na Aruba, esta e di 100 aña di existencia di aviacion na Aruba.

   Riba e fecha di 18 Augustus 1923, e prome avion a ateriza na Aruba na Paardenbaai na Playa.  Desde e dia ey, e industria di aviacion na Aruba a pasa den un crecimento impresionante, y awor ya caba e ta un parti indispensable di economia di Aruba.

   Pa por a celebra e etapa historico aki di 100 aña di aviacion, Aruba Airport Authority hunto cu Gobierno, Departamento di Aviacion Civil, Aruba Tourism Authority, Gobierno, y ANSA NV, a organiza un asina yama ‘Aruba Aviation Expo 2023’ riba Diadomingo.

   Esaki tabata na e terminal di Aeropuerto Priva di e isla, unda profesionalnan y amantenan di aviacion, spotters, y mas a acudi pa asina haya sa mas di e desaroyo di aviacion, check varios avion, purba nan habilidad riba simulatornan di vuelo, y mas.

   Wardacosta di Caribe Hulandes a bay cu nan avion Dash-8 tambe pa mustra con parti di nan trabao ta pa cuida costa di e isla.  Cuerpo di Bombero a bay mustra con nan Crash-Truck tey pa yuda den cualkier emergencia.  Por a check Helicopternan tambe di cerca, y avionnan priva.

   Paden tabatin algun area di saca potret, por a check avionnan di remote control, checke asientonan di avion, splicamento di e plan di Gateway 2030 di Aeropuerto, y tambe interesante splicacion di FMSA pa cu asunto di jetfuel y con ta mantene calidad halto di esaki na Aruba.  Un pabien na e organizadornan cu e exitoso dia aki.