Nathalie Maduro, directora:
ORANJESTAD (AAN): Segun directora di Santa Rosa, Nathalie Maduro, a splica, ta importante pa tur criado di bestia mantene nan bestianan aden pa motivo cu asina por controla kico nan ta come. Tambe por wak si tin bestia malo of cu mester wordo atendi.
Hopi biaha e bestianan cu ta ariba caya, e criadonan no por wak si nan ta bon cu e consecuencia cu tin di nan cu no ta bay cas bek pasobra nan a muri ariba caya. Esunnan cu ta zwak, nan ta topa algun cacho ariba caya y nan no por core y nan ta mata nan, Maduro a indica.
E directora di Santa Rosa a haci un apelacion atrobe na tur esnan cu ta pensa di bay horta bestia, ya cu ta wak cu e criadonan ta mas uni, pa tene na cuenta cu te hasta tin potretnan cu ta wordo publica ariba medionan social di hendenan cu ta wordo sospecha di ta haci esaki.
Ta spera cu esaki no ta bay bira un problema cu tin situacionnan fastioso pa e criado ni pa otro hende. Pesey prome cu dicidi pa horta un bestia di un hende pa pensa hopi bon y corda riba e trabao duro cu e persona ey tabata tin pa tin su bestia gordo y den bon condicion, a remarca.
Maduro a indica cu a combersa cu Minister Arends pa wak, mescos cu e proyecto di cacho cu pushi cu ta wordo gechip, pa cuminsa haci'e pa bestianan den Santa Rosa mes. E proposito di e bestianan cu Santa Rosa ta bende ta pa criansa y no pa wordo mata.
Den e caso aki, si un di e bestianan di rasa wordo horta mes, cu por controla y wak di ken e bestia ta of tambe pa den casonan cu e bestia ta perdi. Si ta mustra cu ta algo cu lo por traha y cu cunukeonan por haci uzo di dje, e ora definitivamente Santa Rosa lo haci e peticion na minister pa e criadonan cu ta registra na Santa Rosa cu nan bestianan por haya e chip y wak si asina por tin un tiki mas control, Nathalie Maduro a duna di conoce.
