Hopi emociona y contento cu porfin St. Aloysiusschool ta na turno pa renoba

Cabesante Vladimir de Cuba:

ORANJESTAD (AAN) –  Vladimir de Cuba, cabesante di St. Aloysiusschool na Noord, den entrevista cu DIARIO a expresa cu e ta sumamente contento igual cu su coleganan y mayornan di e alumnonan, cu e renobacion di e scol, porfin a cuminza.

“Nos ta mira cu hopi speranza cu pa fin di e aña calendario aki, nos por drenta na nos edificio original bek. Manera ta conoci, nos ta bay haci cuater aña den e edificio di VAC na Playa. Mi mester bisa si, cu e hendenan a trata nos masha bon, e lugar ta na nos agrado, pero na bo mesun cas bo ta sinti mas comodo, y akinan e muchanan tin hopi mas espacio pa hunga; e localnan ta na e medida cu mester ta, y bo por tin e cantidad di mucha cu por tuma den un klas”, Vladimir de Cuba a señala.

El a agrega cu esaki ta nan vision pa dilanti pa nan por ta bek den St. Aloysius School, y e ta hopi contento cu e minister actual a haci su esfuerzo pa tuma tur paso necesario, hunto cu SKOA, pa por haci e renovacion necesario, pasobra e scol aki pasobra pa añanan caba nan ta yorando, abogando pa un turno, y por fin nan a yega na dje.

Por observa e cabesante di St. Aloysius School, hunto cu Minister Endy Croes, Presidente di Parlamento cu tabata docente den e scol aki, y varios Parlamentario cu tabata presente durante e acto protocolar pa anuncia oficialmente e renovacion di e scol.