ORANJESTAD (AAN): E escritor, poeta y ensayista Arubiano Quito Nicolaas a ricibi un Condecoracion Real tambe na Hulanda.
Riba e tereno di Floriade, burgemeester suplente di Almere Ank Bijleveld a otorga Quito e “lintje” di “Officier in de Orde van Oranje Nassau” den presencia di Minister Plenipotenciario Suplente mr. Ady Thijsen, famia y amigonan. Quito a ricibi e condecoracion pa su meritonan pa e cultura Arubiano y su colaboracion na e relacion entre Hulanda y Aruba y asina reforsa e relacion entre ambos partner di Reino.
Den su discurso burgemeester Bijleveld a menciona e meritonan di Quito como escritor y di tur su publicacionnan. Cu su obranan Quito ta un gran defensor di e idioma di Papiamento. Bijleveld a sigui bisa den su discurso cu Quito ta haya inspiracion pa su skirbimentonan door di su viahenan, desaroyonan na su isla natal Aruba y politica. Quito ta worde considera como un “bruggenbouwer” den e relacion entre Aruba y Hulanda y ta worde mira como un pilar di cultura Arubiano.
Minister Plenipotenciario Suplente mr. Ady Thijsen a felicita Quito Nicolaas cu e condecoracion aki y a bisa cu Aruba ta orguyoso di su persona y si logronan como escritor, poeta y ensayista.
E potret aki pa cortesia di fotografo Lex Beers.
