ORANJESTAD (AAN): Rudy Wester, Hefe Suplente di Seccion Bijstand, na Departamento di Asunto Social (DAS), a duna di conoce cu, lamentablemente, pa motibo di e pandemia di Covid-19 mas persona a bin acerca pa cobra bijstand, y esey a haci cu na placa e ayudo aki a bira mas.
No obstante, nan ta mira un caida den e cantidad di cliente di bijstand pasobra hopi di nan a haya trabao, pero asina mes esnan cu ta cobra bijstand ta hopi y e suma pa luna ta 3 miyon Florin.
El a agrega cu pa ley, mester bin cu un control riba bijstand tur aña, pero tin un situacion riba dje pa cual e no ta tumando lugar; pero tin un control pasivamente tras di desk, pasobra nan tin recursonan cu por uza pa nan haya informacion, nan tin nan tip-lines tambe y pesey e entrega di e scol verklaring nan kier pa e mayornan haci esaki personalmente, pasobra ora nan ta haci e control nan ta wak si e cliente ta bibando den e mesun adres y si tin cambionan den e situacion.
El a comenta cu hopi biaha e mayornan ta haya e yudanza pa nan yiunan pero, lamentablemente, ora di control nan ta bisa cu e yiunan no ta biba cerca nan mas, anto pa un aña largo nan a haya placa cu nan no tin derecho riba dje, y DAS tin cu bay cobra nan e placa back.
“Anto, tur esey ta pasa aworaki. Nos ta probecha esaki pa nos por controla si tur informacion basico ta update: esta, si e adres, telefon ta corecto, si tin entrada of no, pa nos por bisa nan cu e bijstand tin cu bay worde ahusta of e mester worde termina”, Rudy Wester a subraya.
El a agrega cu tin varios caso cu nan a constata cu a cobra bijstand sin tin derecho riba dje y actualmente nan ta cobrando nan un suma hopi grandi. Pa ley, e personanan aki tin cu paga e placa bek!
