Presupuesto di Algemene Rekenkamer y di Parlamento 2021 a keda proba
ORANJESTAD (AAN): Diamars mainta, tabata tin un sesion Parlamentario unda a keda aproba tanto e presupuesto di Algemene Rekenkamer (ARA) y di Parlamento pa loke ta 2021.
E sesion a wordo dirigi door di Ursell Arends, den funcion di Presidente y e biaha aki no tabata tin ningun persona riba e lista di oradornan pa hiba palabra y asina a bay over pa pasa pa e votacion di e begroting di Algemene Rekenkamer 2021 cual a keda aproba unanimamente.
Como di dos punto di agenda tabata tin e presupuesto di Staten unda Parlamentario Edgard Vrolijk a presenta un nota di cambio cual tabata tin di haber cu e presupuesto.
El a bisa cu a presupuesta locual ta salario completo pa 2021, pero mirando cu ta 'tot nadere orde' a haci e calculacionnan corespondiente. Pero tambe tin cu haci locual ta cambio riba peticionnan.
Vrolijk a expresa cu no a spera cu lo a bin un eleccion asina tempran y no a presupuesta e 'overbruggingstoelage' pa un periodo asina largo ya cu eleccion tabata na September, pero el a tuma lugar na Juni.
Tin un grupo di 13 hende riba 'overbruggingstoelage' cu kisas cu sintamento di gobierno e por bira un tiki menos. Pero mester tene cuenta cu esey, e parlamentario a remarca.
E nota di cambio aki a wordo entrega na Presidente pa locual ta e cambionan haci. El a agrega cu ya e cambionan a wordo entrega pasobra Staten ta cay bao di Minister di Algemene Zaken y den e aprobacion di e presupuesto cu a wordo aproba 19 di Augustus e cambionan aki a wordo teni na cuenta caba y aproba door di Parlamento unanimamente, a splica.
Pa loke ta e votacion aki tampoco tabata tin oradornan y asina a bay over na aproba unanimamente pa e proyecto di ley aki.
