Pabien na Lucas y Jorienne
ORANJESTAD (AAN): Algo cu Diasabra anochi den Aruba Entertainment Center na Dakota a wordo hopi comenta, ta e hecho cu riba escenario pa e Eleccion di Reina Infantil y tambe Reina Hubenil, tabatin dos hoben cu a fungi como MC henter anochi.
Sigur un palabra di pabien di DIARIO ta bay na e dos maestronan di ceremonia, esta Lucas Geerman Jr., y Jorienne ‘Jori’ Angela. Nan articulacion di palabra, e forma claro di papia, hunto cu e tonada tabata agradabel pa scucha. Fuera di esey nan tabatin un bon ‘situational awareness’ pa asina sa kico ta pasando riba escenario, y tabata funciona bon cu e coordinacion riba escenario y cu esnan encarga cu musica. Por tabatin 1 eror chikito, pero esey no ta motibo pa nan wordo demotiva.
DIARIO a compronde cu e duo aki a ricibi coaching di e conocido Terrick Ras, y di e forma ey nan a haya tur e hermentnan basico y avanza pa por a carga e show aki di comienso te fin. Palabra di pabien na Lucas y Jorienne, y boso outfit tabata fenomenal.
