Hopi atencion pa e plannan yen di idea cu awo a bira oportunidad pa ta realidad

Ministro Gerlien Croes impresiona cu Kingdom Start Program

ORANJESTAD (AAN): Siman pasa den aula di Universidad di Aruba, a culmina un trayecto inspirador di 6 siman di Kingdom Startup Program, cu participacion di studiantenan di Aruba, Corsou y St. Maarten.

   Pa esnan cu no sa, e ta un proyecto basicamente similar cu e show “Shark Tank” cu ta pasa na ABC Network na Merca, pero esun di islanan Caribense Hulandes aki ta mas diversifica.

   Durante e Showcase Event, cada grupo a haya 3 minuut pa presenta nan pitch y convence potencial inversionista y partner di e producto of servicio cu nan a desaroya. Un tremendo demostracion di creatividad, ‘entrepreneurship’ y colaboracion den Reino.

   Ministro di Enseñanza, Gerlien Croes a duna pabien na tur e gruponan pa nan excelente presentacion, y un felicitacion special na e 3 gruponan di studiante cu a ricibi un suma pa por duna e prome pasonan pa realisa nan proyecto.

   Su mensahe na nan, ta pa nan sigui crea, sigui innova y sigui transforma ideanan den oportunidad.  E potretnan aki ta pa cortesia di Ministerio di Enseñanza Aruba.