Hopi alegria y admiracion pa e dos muchanan cu a keda 8 dia den Mina di Fosfaat

Parti di e Hazaña di Heintje Ras -ORANEJSTAD (AAN): Cu cantamento di Himno di Aruba door di Danilo Vrolijk, riba Diadomingo atardi e dos hobennan Alzachary y Alzachayla

a sali for di e punto di acceso di e Mina di Fosfaat, despues di a pasa 8 dia ta acompañando nan tata.

   Parlamentario Alvin Molina di MEP tabata presente, y el a bisa cu e mes tin hopi respet pa e hobennan aki, y e esfuerzo cu na a haci pa keda 8 dia eybao den tur e calor, sin nada di luho.  Hopi admirable cu envez di a goza nan dianan di October vakantie ta pasa tempo riba TikTok of riba Videogames, ta impresionante cu nan a escoge pa haci esaki.

   Y e motibo pakico nan a hacie, pa asina sostene nan tata cu ta bayendo pa e hazaña di 100 dia, pa yega na e Mega Museo, y ta pa eleva e nomber di Aruba ora cu kibra e record y Aruba sali un biaha mas den Guinness Book of World Records.

   E prome cu a sali for di e punto di acceso tabata e mucha muher Alzachayla, kende a wordo ricibi cu ovacion di aplauso.

   Den un declaracion, Alzachary a bisa cu e experiencia tabata unico pa nan.  Ora cu nan a drenta, nan a sinti hopi orguyo pa mira nan tata.  Nos por bisa cu nos a experiencia algo hopi nobo, y nos tin di bisa cu nos tata ‘is the best dad’,” Alzachary a indica.

   Alzachayla tambe a papia, y el a bisa cu e prome dia no tabata facil, pero a costumbra.  Awor cu nan ta bay laga nan tata eybao, nan ta bay haya hopi falta di dje. 

   Un di e boluntarionan, Mario Perez Jr. a splica cu Heintje Ras ta den bon condicion, e ta entretene su mes den e Mina, haciendo su mes bezig.  E tin e resto di dianan pa keda eybao, y cu perseverancia e lo logre y tur cos lo bay segun e plan y e caminda.

   “Nos como voluntario a duna di nos parti pa monitor tur cos, y percura pa e cana corectamente,” Perez a bisa.

   E dama Carina di Aruba Explorers tambe a hiba palabra, y a bisa cu nan a duna tour tanto Diasabra y Diadomingo pa yuda recauda fondo.

   E muchanan aki ta tremendo, tin un curashi increible, y nos ta hopi orguyoso di ta parti di e team di boluntario cu ta yudando Heintje.

   Diasabra venidero, esta 16 di October 2021 for di 4:00 pm te cu 6:00 pm, tur hende cu kier baha den Mina y dal un tour pa conoce e Mina, ta bon bini.  Diadomingo 17 di October 2021 e ta for di 9:00 am te cu 12:00 pm.  Lo cobra pa participa den e Tour safe aki.

   E actual Reina di Carnaval Escolar 2020 y futbolista di RCA, esta Stacey Sevinger tambe a hiba palabra.  E tambe ta forma parti di e boluntarionan cu a duna tours, y el a mustra di ta hopi orguyoso di e dos hobennan aki cu a keda 8 dia largo den Mina di Fosfaat.  “Nan a inspira ami, y sigur hopi mas hoben pa sigui e reto y nunca kere cu nada ta imposible.”  Sevinger a indica cu e tambe riba Diabierna a sinta cu nan den e Mina y come cu nan.  E ta sigur cu den futuro lo bay tende mas di e hobennan aventuroso Alzachary y Alzachayla.

   E ta 25 minuut leu: DIARIO a bishita 2 biaha e ciudadano Heintje Ras eybao.  Corda bon cu e mes no ta kedando eybao unda e trapi ta poni.  Bo tin di cana como 25 minuut bao di tera den direccion zuidwest te ora bo yega na e ‘aula’ subteraneo grandi unda Heintje ta kedando.  Esaki ta pa clarifica un relato falso cu un hende a skirbi siman pasa riba social media cu el a baha e trapi pero no a topa cu Heintje eybao.  Shon, bo tin di cana basta bon pida leu, y e ta durabo net 25 minuut pa yega!  Y si bo no sa cual ruta pa tuma, lo bo dwaal tambe.

   Heintje Ras a mustra caba cu e ta orguyoso di su yiunan, y mundo a mira kico ambos ta capaz pa haci.