Hopi a duna man pa yuda Orthopedagogisch Centrum Aruba haya su hardin di alimentacion

ORANJESTAD (AAN): Hopi boluntario, cu demas personal y hobennan balente a pone man hunto riba Diasabra mainta,

pa haci e proyecto di Agroforesteria na Orthopedagogisch Centrum Aruba den Pampunastraat na Dakota bira realidad.

   Resultado ta un otro super exitoso instalacion di Hardin di Alimentacion.  E biaha aki un gran cantidad di boluntario a saca di nan tempo pa yuda e Centro Orthopedagogico haya nan hardin.

   Un proyecto cu mas cu brinda hendenan oportunidad pa siña planta y cosecha, ta treciendo henter comunidad hunto. Asina a demostra cu uni por traha ariba un mihor mañan pa Aruba.

  Ainda falta algun hardin di Agroforesteria pa instala den e fase aki. Bin yuda Aruba bira mas sostenibel.  DIARIO a compronde cu Diasabra awor, 16 di November lo bay traha riba e hardin di alimento na Centro Kibrahacha 60+ na Piedra Plat.

   Diasabra 23 di November venidero, lo bay haci esaki na Kinderhuis Imelda Hof na Noord.

   Tur boluntario ta bon bini, y abo como boluntario por registra bo mes na:

www.bit.ly/plantamata

   Den pasado por a nota cu varios persona conoci a presenta como bolutario, incluyendo pareha turista cu a nota e actividad riba social media, y a dicidi pasa duna un man.